Shillong: Ka seiñ saiñ hima kawa tip kam ka Lok Janshakti Party (LJP) ynne ka sngi da pynbna ko ya ki ar ngut ki kyrtong ki wow yakhun ya ka MLA Election 2018 hapoh ka jylla Meghalaya.
Hawa yaklam wa kiwa pathai khubor, u Jamil Ahmed President ka LJP Meghalaya State Unit da pynbna u ya ki ar ngut ki kyrtong ki wow yaleh ha kani ka MLA Election 2018 wa kynthup ya u Denis Tynsiar na Pynursla wa ka Arelitha K Sangma na Selsella, West Garo Hills.
U Ahmed da ong u wa ka party LJP boohthong ko palat 30 ngut ki kyrtong neibynta ka Election MLA ha kani ka jylla Meghalaya lada yoh ko ya ki bru kiwa biang, kiwa chkeh wei ki wym em chah baad.
Chooh chooh da ong u wa ka LJP ym pdiang ko ya ki bru kiwa da em teiñ ha ka kaam saiñ hima tangwa daw pdiang ko ya ki bru kiwa thymme.
Da pynksan u ya i klam u deiwa kynthah ya ka party thymme ha ka jylla, ka Peoples’ Democratic Front heiwa da em ki dkhot toh kiwa em bynta ha ini i kaam saiñ hima nachwa.
Da ong u leh wa i yahkhmat ka sorkar ka Congress da ieh beiñ hieh ko ya ki paidbah khamtam ha ki thaiñ nongkyndong deiwa kop u leh wa lada jop ka LJP ka sorkar u theh ko ya ki kaam pynroi ha ki thaiñ nongkyndong.
Discussion about this post