Shillong: Ki 13 tylli ki seiñbhalang wa kyrchaan wow pynkrehkaam ya ka Inner Line Permit (ILP) ynne ka sngi da maham ko wow chna da ki yong ki hi ki Entry-Exit Point wow pait yei psiah tooh kiwa na baar chapoh ka jylla wei kini ki 13 seiñ da ong ki wa kani ka kaam da sahkut ko kattu la 4 snem wow booh ya kini ki khyrdop wow sylli yei psiah i mih ki baar jylla.
Ya ini da pynbna ynne ka sngi ha ka chong kylleiñ mynngor wa pynman kam chibynta ka yakhih wa nyngkong wa pynman ha thaw pynyieñ kari ka Additional Secretariat, Shillong.
Ha kani ka sngi da em ki dkhot ka seiñ Khasi Students’ Union (KSU), Federation of Khasi Jaiñtia and Garo People (FKJGP), Hynñiewtrep National Youth Front (HNYF) wa kiwi kiwi.
U President ka KSU u Lambok Starwell Marngar hawa yaklam wa kiwa pathai khubor da ong u wa, “I ym emlaad de i da iwi tawon lait noh wow kit i ha i ya kani ka kaam wow booh ya ka Entry-Exit wow pait bniah yei wan psiah pyrchah ka aiñ ki baar jylla chapoh ka jylla Meghalaya.”
Da beiñ joor u leh yeiwa rukom krehkaam ka sorkar kawa kular du ha ki kot ki sla nadooh ka sorkar warim wei kattu chong ha ka sorkar wa katni wow pyndpep ko yeiwa kular wei ym emkaam de wow yaklam neibhah da yang slem wei hadooh katni ym pu yoo leh ya ka wi leh ka Entry Exit Point kawa da pynyieñ wei ka seiñ leh da e dorkhat ko ha u montri rangbah ka jylla wow chimkhia ya kani ka kaam nadooh wa pynbna ka Assam ya ka NRC.
Na ki 41 tylli ki Entry wa Exit Points wa dadep jied 18 tylli toh kiwa em hapoh ri-loom Khasi wa Jaiñtia wa 23 tylli ha ri-loom Garo.
Heijooh i por leh u President ka KSU da ong u wa mynjur u yeiwa ong u Conrad wa ymye u pynkrehkaam chisyndon ya waroh ki Entry Exit Points tangwa da ong u leh wa toh u sdang chwa iwi hadien iwi ymtoh de u pynslem.
Discussion about this post