Ka lympung yalehke Badminton wa pynlai daka Loompyrdi Iongpiah Sports & Games Committee wa tip kam ka 19th Open to All Badminton Championship 2022 da sdang ko ynne i janmiet ha Seiñraij Jowai Indoor Sports Hall Complex deiwa wan chimbynta ki 114 ngut kiwa yalehke ha ki kyrdan waphær waphær wa kynthup ya hapoh 19 snem, 35 snem chaneiñ, 50 snem chaneiñ, ka Open Men’s, ka Mixed Double, ka Single wa Double.
Chwa u sdang ka yalehke, neiliang u A. Niangti, Waheh Chnong ka Loompyrdi da e u yei klam yahkhmat hajrong ka thong yong ka dorbar chnong u pynman kam kani ka yalehke, wei ngait skem u leh lyngba ini i pyrchang yong ki daw ye u pynmih ya ki khynnah ki wow rah naam rah burom yaka District ka jylla waroh kawi.
Neiliang u kongsan yong kani ka sngi, u K. Passah, District Sports Officer, West Jaiñtia Hills District ong u wa ka Badminton da sdang ko u ku hapoh ka District ym kam heipor nachwa, sñiawkmen u leh wow yoo wa ha uni u snem naka chnong Shangpung leh da boon bha kiwa wan chimbynta.
Pynrap haroh u wa ka chnong Shangpung man ko leh ka chnong wada mih chakhmat u chimbynta haki jait Sports waphær waphær wot ki jait Sports wym rap em de ha Jowai leh.
Kamtæ hawa e khublei yaka chnong Shangpung kawa da embynta u pynku yaka Sport, kyntu haroh u ya kiwi won ki chnong leh u chimkhia ki neibhah ka Sport hi katni da man ko leh ka laad kamai.
