Ka 1st Knock-Out Football Tournament wa pynman da ka 5 Shnong Social and Cultural Sports Club, Mukhaialong da wan wai ya ka da u MLA ka Khliehriat uwa man u Montri ka sorkar jylla, u Kyrmen Shylla ynne ka sngi.
Chwa wow sdang da em ka yalang wa tbian heiwa da yoh i klam pdiang burom na u Chairman ka Sport Committee, u Mul Phawa kamjooh leh i pyndeiñ syntu na ki khynnah skur ka San Shnong Secondary School, Mukhaialong wa i chaad na ki khynnah skur.
Da yoh leh i klam neiliang u Secretary ka Club, u Andres Sana uwa da ong wa i thmu wow pynman ya ka lympung toh wow kyrchaan ya ka San Shnong Secondary School, Mukhaialong.
U Kyrmen Shylla hawa e i klam da kitbok u ya ka Club 5 Shnong wa ki kaam yong ka wow man ki kaam wa lai bait lai ryntih nadooh wa sdang hadooh wa kut deiwa yaroh leh yei yatylli ka thaaiñ San Chnong wa ye u pynman ya kani ka lympung.
Da ong u leh wa kini waroh wa em i yatylli na ki waheh wa sian, chynrang, khynthai, khynroo, khyllood deiwa pyntip wa ym slem de wa ki kaam pynroi ha ka thaaiñ San Chnong daw yoh sa kawi ka madan khian namo ka 7-A-Side harood ka madan heh.
Da yoh leh i klam na u synbood kongsan, u Lasky Rymbai Dy. CEM ka JHADC uwa da klam chaphang ka roi ka paar wa da ku bha kani ka thaaiñ khamtam ha ka kaam uiñke suwari, wei i yakrehlang chirup wa u MLA da yooluti u wow ye u pyndep ya ki kaam wa sahteiñ.
Ha ka yalang da yoh leh i klam wa tbian na u Waheh Chnong ka Cham Cham, u Karlud Dkhar wa u MDC warim, u Helping Phawa.
Da emlang leh ki waheh ka San Chnong waroh wa na kiwi ki thaaiñ, ki bru pawkhmat kam u Hamlen Rymbai, u Justice Lyngdoh, u L. Shylla, u Poimi Sana wa u Pyrkash Phawa.
Ha ka yalehke wa nyngkong ka lympung hapyrdi ka Legend FC pyrchah ya ka KSFC, ka yaleh da man ko kawa yoosuk bha heiwa ka KSFC da thap ko 1-0 ha ka kylla step lyngba uwa lehke wa sap Jersey No 5.
Ha kani ka lympung kiwa jop ya ka Final u yoh ki Rs. 5 lak katwa kiwa rem Final won Rs. 3 lak.
Kani ka Wyrta toh kawa da phah da u Tyrnit Pdeiñ, u General Secretary ka Club.
Discussion about this post