Ka 4th Evening Super-4 Football Tournament 2022 wa pynman da ka Sports & Youth Affairs Committee ka Chutwakhu Social Welfare Local Durbar, Jowai da wan wow wai pyrda ya ka da u A. Andrew Shullai uwa man kam u MDC ka Jowai Central ynne i miet.
Kani ka lympung yalehbol toh kawa mar soo ngut chiliang wei kawa da pynman hei miet deiwa pynche da ki bordiñ ha madan yaleh Basketball ka Chutwakhu.
Ka liang wa rah ya ka Final daw yoh ki ya ka song-poisa kawa T. 20,000 katwa kiwa rem daw yoh ki T. 10,000 wei waroh ki liang wa da wan wow chimbynta da em ki 32 tylli.
Ynne ka sngi sdang da pynman le tylli ki yalehke wa da sdang hapyrdi ka Mawlong FC waka Mid’s United wa da jop da ka Mawlong da 3-2.
Ya waroh ki kool ka Mawlong da thap da u Primrose Lamat ha ka minit wa 9, 31 wa 46 katwa ya ka Mid’s United da thap da u Roplin Ramut ha ka minit wa 15 wa u Fourki Rymbai ha ka minit wa 17.
Ha ka yalehke wa ar, ka Mafia FC da jop ko ya ka Trediengling da 6-1.
Ya ki kool ka Mafia da thap da u Riburom Jat ha ka minit wa 2, 29, 42, 47 wa 50 wa u Milan Synnah ha ka minit wa 9. Katwa ya ka Tredienling da thap da u Critic Pyrtuh ha ka minit wa 3.
Ha ka yalehke wa le, ka Jayden’s FC da jop ko ya ka Bonhill da 7-3.
Ya ki kool ka Jayden da thap da u Eddie Laloo ha ka minit wa 14, 25, 30 wa 39, u Gladio Susngi ha ka minit wa 4 wa 16 wa u Lalthakhuma Ngaite ha ka minit wa 42. Katwa ya ka Bonhill da thap da u Mebanker ha ka minit wa 9, u Douni ha ka minit wa 28 wa u Robert ha ka minit wa 32.
Ki yalehke mynstep toh hapyrdi ka Brother Hood FC waka Pieh FC heipor 4:30 i janmiet wei daw pynbood da ka Dongmihsngi Junior’s pyrchah ya ka War Boy’s FC heipor 5:30 i janmiet.
