Jowai: Ka yalehke Badminton wa tip kam ka 14th Inter School Badminton Championship wa pynlai daka West Jaiñtia District Badminton Association chirup i krehlang ka yungkrehkaam u District Sport Officer, West Jaiñtia Hills District da sdang ko ynne ka 30 tarik ha Chutwakhu Indoor Sport Hall.
Chwa wow sdang ka yalehke da em chwa ka yalang tbian wa pynlai da u W. Dkhar uwa man u Chairman ka Tournament Committee chirup i emlang kiwa sikai naki skur wapher wapher, ki manbei manpa, ki dkhot yong ka Association wa kiwi.
U kongsan u E.M.H. Passah Working President ka West Jaiñtia District Sport Association, chwa wow wai u ya kani ka yalehke da e u yei ktien kyntu kyrsu yaki khynnah skur, wa hawa yalehke toh u chimbynta na mynsien khnang yow yoh u yoo yei sap wa em haki kamjooh leh yow yoh ki yei jop.
Da kyntu haroh u wa kam ki khynnah skur, hapyrdi i pure puthi leh toh u pyllait kyrpang yei por ya ki kaam yalehke Sport neibhah kani leh man ka bynta wa emkam deilang i puræ puthi, wei katni pathan, nalor wa yoh yei doh i pran wa chait wa nang, ka Sport da man haroh ko ka lad wow e khih e kreh.
Ha kani ka yalehke da wan chimbynta kamwa 159 ngut ki khynnah skur kynthai wa chynrang naki 10 tylli ki skur waphær waphær. Wei yei rukom yalehke da bhah katkam i rta kynthai wa chynrang wa kynthup ka Under-13, under-15 waka Under-17.
Kamte kani ka yalehke u man ko 4 sngi lynter heiwa u pynkut won yaka haka 3 tarik u Naisan.
Discussion about this post