Ka jylla Meghalaya ynne da sdang ko ya ka State Mental Health Helpline-14410, kwa ye ki bru wow Phone kiwa emkaam yarap yasyllok heiyatoh wa i chait i khiah i bor pyrkhat pyrdaiñ iwa da leh yow pynyoh yei yarap wa duna i lut i sep hapoh ka jylla.
“Ini toh i sarong ya i wa hadien chi bnai wa da pynbna ya ka State Mental Health Policy da ye wot wow wanrah ya ka Mental Health Helpline kawa emkaam bha wow e kyrchaan ya ki bru heipor wa biang,” da ong u Montri ka chnat i Chait i Khiah, u James Sangma hawa wai ya kani ka Helpline deiwa emlang u P. Sampath Kumar, IAS, Principal Secretary, ka R.M. Kurbah, IAS, Secretary, u Ramkumar S, IAS, Mission Director ka National Health Mission, Dr. Y.A. Phira, CEO, State Mental Health Authority, Meghalaya wa u Dr. S.S. Nongbri, Director, DHS (MI/MCH&FW) cum Jt. MD ka National Health Mission, Meghalaya.
Uni u Number toh u Ttoll-Free uwa ym emkaam wow su, uwa krehkaam nadooh 10:00 waje i step hadooh 5:00 waje i janmiet (Monday hadooh Friday) wei kiwa Phone ye ki wow jied yow yaklam dei ktien Khasi, Garo, Pnar, Hindi lane English katkam wa sñiaw biang ki.
Da em kamwa 50 ngut ki Counsellor na kylleiñ ki District kiwa da embynta ha uni u Helpline. Hadien daw pynkrehkaam ya uni u Helpline waroh 24 kynta chi sngi deiwa pynyabi lang oo wa ki yong ka sorkar pyrdi ka Tele-MANAS Network (Tele Mental Health Assistance and Networking Across States).
Kiwa Phone daw yoh ki wow yaklam wa ki Mental Health Specialists kam ki Psychiatrist, Social Worker, Nurse wa ki Psychologist katkam wa emkaam. Lada emkaam wow yachem dei bru, daw khana ya ki cheiwon wa hap ki wow lai kam cha ki Health and Wellness Centre, ki Primary Healthcare lane ki Tertiary Healthcare.
Kam wow pynkynmoo wa ha u Kmaichonglad (Dec) 2022, ka Meghalaya da man ko ka jylla wa nyngkong ha thaaiñ North East wa ka jylla wa le hapoh ka ri wow wanrah ya ka Mental Health & Social Care Policy dei thmu wow pynbha pynmait yei rukom sumaar wei e yarap cha kiwa chitom hei bor pyrkhat pyrdaiñ wei wow pynduna leh yei tlot wei ktah wa da mih na kini ki jait chitom ki bru.
