Sdang ka NPP sa ha ka jylla Mizoram ynne ka sngi

Aizawl: Dei thrang wow chakri ya ki paidbah ka thaaiñ mihsngi, ka National People’s Party (NPP) ynne ha Aizawl da sdang ko ya ka Party ha jylla Mizoram hei emlang u National President ka Party uwa man leh u montri rangbah ka jylla, u Conrad K. Sangma.

Ha kani ka yalang da emlang u montri ka kaam pohyung ka jylla, u James K. Sangma, u Deputy Speaker u Timothy D. Shira, u montri ka tnat Sports ka Manipur u Letpao Haokip, u Chief Adviser u montri rangba ka jylla u Thomas A. Sangma wa u Government Chief Whip u Marcuise Marak.

Ka NPP da pyrchang ko wow sdang ya ka party ha Mizoram la chi snem piah kattu wei da sdang ko leh ya ka ktien im sngi (Campaign Slogan) yong ka iwa ong – “One Voice, One Northeast” namo kawi ka sur kawi ka thaaiñ mihsngi.

U Conrad da ong u wa ka NPP thrang ko wow pynmiatdur ya ka Mizoram wa ka thaaiñ mihsngi waroh kawi.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Hawa pynbna wa da sdang ya ka NPP Mizoram State, u Conrad Sangma da ong u, “U symbe ka Party toh neibynta ka thaaiñ mihsngi waroh kawi kamwa da thrang u pa yong oo u (L) P.A. Sangma.”

Hawa pynksan yei skem mynsien ka NPP u Conrad da ong u wa daw pynkylla yei dur ka Mizoram, kawa man ka jylla Christian ki bru ri-loom ka thaaiñ mihsngi.

“Hapoh India em palat 100 million ki bru ri-loom namo ki Tribal Population tangwa ym em wa kwah wow ap ya ki. La 50 snem wa da lai nadooh wa laitlooid ka ri tangwa ym jooh em wa man montri da ki bru ri-loom ha ka sorkar India, nga ym pynbaad O katya kiwa em tangwa ki bru ri-loom ka thaaiñ mihsngi wow man montri ki wei ka NPP angnood ko wow pynkylla yeini waroh.”

“Ka NPP man ko ka Party kawa klam hawa chah ktah ki Christian, ki bru ri-loom wa ki khian paaid ka ri wei daw yieñ bait i yei hok yong ki,” da ong u Conrad.

Hanlada ka party ym em pynbna ko ya ki thaw wa daw yakhun ko ha Mizoram tangwa da sdang chna luti ko hajrong kini.

U National General Secretary In-charge ka Mizoram u Dr. Lalrintlunga Jahau da man u u bru wa thwat luti ya ka Party ha jylla Mizoram.

U President warim ka Young Mizo Association (YMA) u Lianzuala da thung ya oo kam u Convener ka Party ha Mizoram wei da ekti ha oo wow seiñ u ya ka Party hei yaklam wa ka National Executive Body ka party.