Ka Ridalin Kyndait naka chnong Sohmynting, West Jaiñtia Hill District da man ko ka nongmuna wa nyngkong dooh napyrdi ki 60 ngut ki khynroo khyllood wa pyndep yei chah sikai seiñkhih namo ka Business Startup wa pynman da u MLA ka 2-Jowai, neibhah du heipor wa tbian da ye ko u seiñ yaka skur ha chnong Sohmynting kawa tip kam ka Blazing Star School, Sohmynting wei da wai paidbah leh yaka ynne ka sngi da u MLA ka Jowai u Wailadmiki Shylla.
I ye ko u sdang ya kani ka skur toh lyngba i kyrchaan lang ka yung ka sem khamtam ka beikhian ko ka Mary Kyndait heiwa ki da emlang ki i jooh i angnood wow seiñ skur neibynta u pynku yei stat i tip kamjooh i myntoi waroh lang.
Ka Ridalin Kyndait kawa man leh kam ka Headmistress kani ka skur hawa klam, da e ko i sñiawngooh ya u MLA ka thaaiñ wa toh lyngba ka chlem e sikai yong oo wa da pyndep ko tæ yoh mynsien ko u sdang ya kani ka skur kawa da em hei pyrkhat i angnood yong ka, wei wot hapyrdi i lai luti yong ka wow pynkhreh yeini, kiwa sikai heipor wa leh ya ka Business Startup da pteiñ ki u e bor e buit kat iwa sñiaw emkaam ko.
Ka thong wa kongsan lyngba kani ka skur ong ko toh u wanrah i rukom sikai wa rap phær heiwa ki khynnah nadooh dang khian u yoh ki yei tip i chemphang ha kiwa boon rukom wym du hei puræ puthi.
“Hanla kani ka skur toh kawa sdang daka yung ka sem yong i leh, i myntoi won wym mut du ya i, tangwa yaka chnong ka thaw hi waroh kawi heiwa nyngkong hi toh i stat i tip wow yoh ki khynnah, iwa ar won man ka laad yoh khih yoh kreh ki khon ka chnong,” da ong ka Ridalin.
Neiliang u Wailadmiki Shylla da dap u dei sñiawkmen wow yoo wa kani ka khyllood da man ko u soh wa nyngkong naka chlem e sikai seiñ khih wa oo da pynman u ha kini ki kajiak bnai neibynta ki khynroo khyllood thooh khih thooh kreh.
Wei iwa pynkmen chooh chooh ya oo toh wa hanla kani ka khyllood ym em jop ko haka yakob wada pynman tangwa da lai ko chakhmat yei kaam wa angnood ko.
“Hadien katu ka e sikai neiliang ki bru yong nga leh dang em bait ki i yajan waki khynnah, wei ki khynnah jooh Phone ki man-i-por wow paan buit neibynta u leh ki kawon kawon ka kam,” da pyntip u Wailadmiki.
Ong u wa em won leh napyrdi kitu wada pyndep i chah sikai kiwa em yaka buit seiñkhih deiwa rap heh wei kattæ i pynkhreh yong ki dang lai i chakhmat.
U Eladmiki Suting, kam u Programme Coordinator ka Business Startup hawa e yumut ong u yow yoh sakhiat yei stat i tip wa pura toh u jied kiwa sikai leh da kiwa biang wym toh u pait para yong yung yong sem hi-eh.
Wei kam uwi wada lai e sikai kylleiñ kamjooh leh uwa da seiñ skur ong oo hi, i daw hi wa chem yei chitom ki khynnah manda poi haki Class wa rap heh toh wym yoh ki i rukom sikai wa biang wa tikna haki skur wa lai ki dang khian, kamtæ kyntu u yaki bor pynlai kani ka skur leh u yakhun pynyoh ki yei sikai wa paka, hanla ye ki u chem chitom hawa sdang tangwa hadien u soh daw mih u.
Ha kani ka sngi da yoh leh i klam na u Octomewot Lamin, MDC ka JHADC, u waheh chnong ka Sohmynting, u Bravestar Phawa, u Wailad Suting, Chairman Dongneiñ wa kiwi haka yalang wa pynlai da u M. Shylla.
Kani ka skur da sdang ko u pdiang khynnah neibynta u snem 2023 nadooh kiwa lai Pre-Nursery hadooh Class-I.
Da em leh i e sñiawbha cha ka Ridalin naki para wa pyndeplang yaka e sikai seiñkhih namo ka Business Startup yong u MLA.
