Kam chibynta wow yarap yei chem chitom ki Bank wow e ram cha kiwa seiñ khih wa khian namo ki Medium and Small Enterprise (MSE), neiliang ka Finance Department ka sorkar Meghalaya da soi ko ya ka soskular MoU waka Credit Guarantee Fund Trust for Micro and Small Enterprises (CGTMSE) hapoh ka Ministry of MSME, ka sorkar India ynne ka sngi yow pynkrehkaam ya ka “Meghalaya Credit Guarantee Scheme (MCGS)” wow yarap pynyoh poisa cha ki MSE.
Kamwa man katni, ki ram wa da chim da ka MSME toh kiwa da bahkhlieh hapoh ka Credit Guarantee Fund Trust for Micro and Small Enterprises (CGTMSE) kawa dapoi 75% na ka ram wa da e hapoh kiwa boon ki MSME Scheme. Tangwa kawa dang sah kawa 25% dang kheiñ hi ki Bank toh kawa heh lada ym ye u su wei ini da pynartatien ko ya ki Bank wow e ram cha ka MSME.
Yow lait neini ka sorkar Meghalaya u ya krehkaam ko waka CGTSME deiwa pynku yei bahkhlieh ya ki ram cha 95% deiwa sdang ya kani ka Meghalaya Credit Guarantee Scheme (MCGS) yow pyntikna wym dooh nong ki Bank.
Lyngba ini, ka sorkar Meghalaya u chim kabu ya ki CGTMSE Scheme ka sorkar India deiwa e na ka T. 5 klur, wei ki kreh wow kynthup dapoi ka poisa T. 250 klur. Wei deiwa kheiñ wa ka ram kawa chim kiwa boon toh kawa T. 1 lak neibynta wow yoh yarap 25,000 tylli ki khih wa da sdang, daw kyrchaan noh ya ki da ka sorkar jylla. Chooh chooh deiwa kheiñ deiwa em 3 ngut ki wakreh ha kawi ka thaw kreh, daw em 75,000 ngut kiwa daw yoh kreh hapoh kini ki karkhana wa ki jait kreh wa khian namo ki MSE wa em hapoh ka jylla.
Ya kani ka MCGS daw sdang ha ka 1 tarik u Khonchonglad (Nov) 2022 wei u pteiñ yeini hadooh wa poi ka thong namo ka mang poisa.
Ha kani ka ya soi soskular da wan wow sakhi da u Montri Rangbah ka jylla, u Conrad Sangma uwa da yooluti wa da ini wa da leh ka sorkar daw pynchlur ko ya ki bru wow seiñ khih ki.
