Shillong: U Union Minister of State (Independent Charge) for Development of North Eastern Region (DoNER), Dr. Jitendra Singh da pynbna u wa ka sorkar daw sdang ko ya kiwa boon ki scheme neibynta ki khynroo khyllood ka thaiñ mihsngi kawa tip leh kam ka Northeast.
Da ong u waka DoNER da sdang ko ya ka “Venture Fund” ya ki Company wa sdang thymme (Start-ups) wei da pyrkhat leh yei sap yong ki ha ki kaam Sports wei daw sdang ya ka Sports University hapoh Manipur ka wow man katkam ka kyrdan wa em cha kiwi hapoh pyrthai wei yei thaw da dep thied ka sorkar.
U Dr. Jitendra Singh da ong u leh wow yarap ya kiwa yaleh exam Civil Service daw pynman ya ki Coaching Class lyngba ki satellite wa tip leh kam ka Tele-Education yow yoh myntoi ki khynroo khyllood kiwa sah cha nongkyndong ki wym yohlaad kamwa yoh kiwa im cha sorbah.
Da yaroh u leh ya ki khynroo khyllood ka thaiñ Northeast yei mynsien rai kut yong ki wow poi ki cha ki thong ha kiwa boon ki kaam hanlada ym em biang ki thaw pynbniah ha ki yalehke wa boon jait, ki thaw puræ wei da e nongmuna u ya ka Dipa Karmakar na Tripura kawa da bna naam ha pyrthai ha ka Gymnastics wei man ko kawa nyngkong napoh ka ri India wa yakhun Gymnastic ha ka Olympics. Da ong u leh wa ka DoNER da pyrchang ko wow yarap ya ka wow pynkhreh ko chwa wow lai Olympics ko tangwa chwa yeini ym em yoh ki u yarap ya ka.
Chooh chooh da ong u wa ha kini ki le snem da boon ki Company wa kwah u wan wai thaw kreh hapoh ka thaiñ Northeast ka wow yarap ya ki paidbah wow yoh kreh ki wei da ku leh kiwa lai uiñke sawari. Ka sorkar u sdang ko da ka Public-Private-Participation (PPP) yow yarap kynrong chooh chooh ko ya ini waroh wei ya ka nong wa mih na kini boon u pyllai cha ka CSR (Corporate Social-Responsibility) yow wanrah ya ki kaam pynroi.
Ka sorkar leh dang pyrkhat ko wow pyndam yei toh dan ka CSR namo deiwa booh da i dor wa katwon naka nong u lai ko cha ka CSR.
Discussion about this post