U Montri Rangbah ka jylla, u Conrad K Sangma ynne da wai u ya ka Shillong Literary Festival, 2022 ha Ward’s Lake, Shillong.
U Conrad hawa e yei klam da ong u wa kani ka tamasa toh kawa da pynman khlieh u snem nadooh u 2018-19 tangwa nei wan ka khlam COVID-19, da ye u sdang biang ya ka ha u snem wa dadep.
Da ong u wa ha kani ka kynti da rap man ko kawa pliah bar ya ka sien wa nyngkong wei kyrmen u wa neini daw man ko kawa heh dooh ym du hapoh ka ri India tangwa ha kylleiñ ka pyrthai. Da ong u wa kani ka tamasa Literary Festival toh wow lehkmen ya kiwa thoh kot wei wow pynchlur ya kiwa dang sdang thoh kamjooh leh wow pynchlur ya ki khynnah wow puræ kot.
Kani ka tamasa daw yarap ko wow yachemlang ki para wa thoh kot wei wow yaklam iwi ya iwi wei ini daw pynchlur i yei bor i thij i pyrkhat wei daw yarap ko leh wow pynman ya ka Shillong kam ka thaw uiñke suwari.
U Conrad da ong u wa emkaam bha wow kreh ha ki bynta waphær waphær nadooh ki kaam Sports, ki kaam uiñke suwari, i chait i khiah, puræ puthi wa i rep i riang.
Chooh chooh da ong u wa iwa eh wa khor hei kylla man sor ka chnong toh i sahkut ki kari, i man bih ki talawiar soodong, i pam ya ki dieñ, i pynemkaam bakla ya ki drugs hapyrdi ki khynroo wa kiwi kiwi deiwa kyntu ya kiwa thoh kot wow khana ha ki parom khnang wa ki paidbah ka jylla wa ka ri u ye i wow pyrkhat wa iwa jia sakhiat.
Heiyatoh wa ki khynroo khyllood wa wan cha kani ka tamasa, u Conrad da ong u wa ki toh ki bynta wa kongsan bha ya ka sorkar, heiwa da kmen u wow yoo boon ki khynroo wa wan cha kani ka sngi. Kyrmen skem u leh wow man ki i bor wa khroo ya ri wei ka sorkar daw yarap ko ya ki wow pynwandur ya i rukom im wa i sap yong ki.
Kani ka tamasa wa le sngi da lehwarom ya i thoh i taar, i rukom im ym du ha Meghalaya tangwa waroh kawi ka ri. Kani ka tamasa leh wai dwar ko ya ki khynnah, ki khynroo wow yachem wa kiwa thoh kot, kiwa chna Film wa ki bru wa pawnaam.
