Jowai: U Meghalaya Assembly Speaker uwa man leh u President ka United Democratic Party (UDP), u Dr. Donkupar Roy ynnin ka sngi da ong wa ym em sñiawkmen u yei pynemkaam poisa heipor Election.
Hawa klam u ha ka pynhiar pyrda ka lehkmen dap 50 snem ka Hill State People’s Democratic Party (HSPDP), u Dr. Roy ong u wa sdang u ya ka kaam chakri paidbah hadooh ka saiñ hima sima khlem em poisa yow yoh yei kyrchaan ki paidbah wa thap Vote.
“Syndet syndet ha u snem 2003 da wan i bor poisa ha ka Election wei boon da chah jied ki bru wa em poisa,” ong u President ka UDP.
Da kdaw u leh wa da sdang ki bru heh spah wow yaleh Election kawa da pynnoh ya ka pyrla cha liang yong ki.
Heijooh i por da ong u wa ym em pyrchah u yei yieñ Election ki heh spah tangwa jooh u pynchlur u ya ki wow ieh yei khih yong ki hadien wa jop wei wow e kti noh cha kiwi wow pait wow pynlai ya i kaam.
Da ong u leh iwa ktah ya ki Party ri-loom toh da boon ware mih ki seiñ kiwa kam wow kreh neibynta ka jaitbru hadooh wa da em ki seiñ saiñ hima da wiar ki kam ka People’s Demand Implementation Convention (PDIC) wa ka Meghalaya Democratic Party (MDP).
U Dr. Roy da kdaw u waroh i yaleh wow pynyatylli ym poi thong ki kamtæ da kyntu u wow dam u pynmih ya ki seiñ saiñ hima ri-loom wa dang thymme.
U President ka UDP da sñiawsih u leh wa boon ki kyrtong wa jop na ki Party ri-loom ieh ki ya ka Party hadien wa jop ki.
Kamtæ da pynkynmoo u wa ha kani ka Election MDC waroh kiwa jop na ki jar jiar ki Party wow neh wa ki Party wa jop ki.
Discussion about this post