Sdang ki MLA u klam dei Khasi wa Garo ynne ka sngi ha yung dorbar chna aiñ ka jylla

Shillong: Ha ka yatai nia hapoh ka yung dorbar ynne ka sngi, neiliang ki ar ngut ki MLA, ka Ampareen Lyngdoh ka MLA na East Shillong wa u MLA ka North Shillong, u Adelbert Nongrum da klam ki da i ktien Khasi kam ka dak wow pynyoo yei wym sñiawsuk yei klam maitphang u lat ka jylla da i ktien Hindi ha ka sngi sdang yong ka dorbar.

Ha i klam Khasi yong kini ki MLA hapyrdi ki ktien Khasi dang em hi leh ki ktien phareng wa pynemkaam ki.

Hawa klam hajrong kani ka phang, ka Ampareen da kynthah ko yei klam u Lat wa duna i kdaw u yeiwa sakhiat wa ki mat wa kongsan neibhah ym em klam che u khamtam hei yatoh wa i sñiaw chngaiñ wow yada ya ki kynthai.

Da ong ko wa ka Police Station toh wow man ko ka thaw wow yada ya ki kynthai kiwa chah thombor wei ymtoh ki pulit u man ki kam kiwa yasaid aiñ wow pyn yasuk wa kiwa leh ya ki kaam pyrchah ya ki kynthai.

Related posts

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Ka Ampareen da ong ko leh wa emkaam wow pynkhlan ya ka ICDS, wow pyllait noh yei chah khang tih mooyong na ka NGT wei wow pynku ya ki kaam uiñke suwari.

Neiliang u Adelbert da paan pynche u na ka sorkar ya i daw wa chah khang ki pastor wym yoh VISA ki wow wan cha ka yaseiñ ha Sohiong wa ha Sutnga wa dang dep pynman kawa da ktah yei sñiaw kiwa ngait niam Khristan kamwa pynbna sngi Good Governance ha ka sngi Good Friday wei wa pynman kreh ha ki sngi wa kyrpang ki Khristan.

Da dawa u leh wow pynyoh khih yoh jam ya ki khynroo khyllood wei wow pynbait ya u pood wa ka Assam wei wow thooh laad yei wan psiah ki bru wa nabaar. 

I klam ktien Khasi ka Ampareen Lyngdoh wa u Adelbert Nongrum da pynman ko sa ya u MLA ka Gambegre u Saleng A Sangma wow klam u leh kajiak da ka ktien Garo hapoh ka yung dorbar ynne ka sngi.

U Saleng da yieñ u wow yachim bynta hadien wa u Adelbert Nongrum wa ka Ampareen Lyngdoh da dep klam ki da i ktien Khasi.

Da ong u wa kani da man ko kam ka yakop hapyrdi ki Khasi wa Garo du neidaw wa klam u Lat da ka ktien Hindi wei daw wanrah ko yei yapra hapyrdi yong ki Khasi wa Garo wei ya ini ym hoi u jia i.

Katwa u MLA ka HSPDP na Mawkyrwat u Renikton L Tongkhar da pynsñiaw u wa ymtoh u leh chongchit yeini du neidaw wa klam Hindi u Lat ka jylla.

Da ong u wa waroh ki dkhot ka yung dorbar toh u klam ki da ka ktien kawa sñiawthooh lang khamtam waroh kiwa tip hi u klam phareng wei ymphær ko lada em kiwa chem chitom u leh ya ini.

Ha iwi tawon i liang, u MLA ka Congress na Nongthymmai uwa jooh man leh kam u Lamphang ka yung dorbar, u Charles Pyngrope da ong u wa katkam ka aiñ pynlai dorbar ym em kawon kawon ka kyndon wow khang u klam da i ktien Hindi kamwa da klam da u Lat ka jylla tangwa emkaam wa kiwa pynkylla cha ka ktien wa sñiawthooh lang waroh.