Shillong: U MDC ka PDF na Mawhati u James Sylliang, uwa chah pynhiar chuki Executive Member (EM) dang ha kini ki sngi wa dadep ha u Pynshngain N Syiem uwa man kam u CEM ka KHADC, da khut lang u ya kiwi ki MDC wow krehlang ki wow khut da ka dorbar wa kyrpang yong ka Council khnang wow yaklam yei pynemkaam ya ka poisa wa T. 28 klur.
Hawa yaklam wa kiwa pathai khubor ynne ka sngi, u James Sylliang da pynbaad u wa u CEM ka KHADC da baam lut u ya ka poisa yong ka Council kawa T. 28 klur na ka T.33 klur khlem em iwon iwon i yaklam namo ka yasyllok ha ka Executive Committee.
U Sylliang da ong u wa tip u ya ini i leh embor u Pynshngain ya ka T. 28 klur, toh hadien wa lai sngoh miej ki MDC ka UDP, HSPDP ha kamra yong oo (CEM) iwa da jia ha ka 28 Thhohlakhmi (February) uni u snem.
Katkam wa ong u James, i daw wa chah pynhiar chuki yong oo toh neidaw wa oo wa ki le ngut kiwi ki MDC wa kynthup ya u Latiplang Kharkongor, u James Ban Basaiawmoit waka Grace Mary Kharpuri, da soi ki ya ka chithi kawa da thoh cha u President ka PDF wow khut noh da ka yalang kawa jhan yow ye u yaklam ya ki kaam u CEM hadien wa u Pynshngain da tyrwa u wow iehnoh ya kani ka kaam.
Ha ka chithi, kini soo ngut ki MDC ka PDF da dawa ki wow khut noh da ka yalang ha ka 10 tarik u bnai wa dadep wow pyrkhat ya ki kaam u CEM.
U James da ong u wa neini i daw wa u Pynshngain da sñiaw thut u wow khut u ya ka yalang wei da pyndooh noh u da ka chuki yong oo (James).
U MDC ka Mawhati da ong u wa em i thmu wow ieh noh kam u EM neibhah wym sñiaw yahaap de u yei leh embor u Pynshngain.
Read Also: Pynbaad ki MDC ka liang pyrchah wa saam u CEM ka KHADC hadooh T. 16 Klur cha ki kyrtong ka PDF
Discussion about this post