U Dr. W.R. Kharlukhi, MP Rajya Sabha naka jylla uwa man leh u State President yong ka National People’s Party, da ong u wa ka lieñ yong ka seiñ All India Trinamool Congress (AITC), ym pær ko hanla ym pu em sdang ko wow lai lyngba ki umbah ki umsan, tangwa da sdang chwa ko wow ngam.
Chooh chooh u Dr. Kharlukhi da ong u wa lada ym ye wow kdoh u khoom ya jar jiar ki bru ha chi thaw, kammon wow ye u kset ya ki thlu kiwa da sdang pai haka lieñ kawa da khreh wow chlai um kam ka lieñ Titanic kawa da ngam noh hapyrdi ka duriaw bah hadien wa da ya tyngkhooh wa u loom thah hapyrdi duriaw hawa lai luti ko.
U Dr. Kharlukhi da phah u ya kiwa yahkhmat yong kani ka seiñ hapoh ka jylla, wa ya katni toh u chimkhia wow kdoh u khoom chwa ya jar jiar ki bru, neibhah toh u tip che iyi wa ye ki wow leh ha ka luti yong ki, wei i daw toh wa ki wan ki wow psiah hi-eh na dwar dien.
Hawa yatoh wa i lai psiah u MDC ka AITC ini wadep cha ka NPP, u Dr. Kharlukhi da ong u wa ini i wan wow psiah toh neidaw wa kam kiwa mihkhmat ki paidbah, ym ye ki wow chynna ya ka mynried wa tyrchaaiñ wow em ha kani ka Party wei uni u MDC wa psiah cha ka NPP toh uwa na ka Constituency wa khlan bha ka yong uwa yahkhmat ka liang pyrchah.
