Shillong: Ha i tyrrah kari iwa da jia ynnin i miet heipor kamwa 9:45, uwi u khynroo wa tip kam u Barikupar Jana uwa 27 snem i rta uwa yah ya ka Scooty ML 05 L 9207 da khlaad u pyn ha i thaw wa jia i chah tyrrah hajan ka Pantaloon Showroom chwa wow poi cha Fire Brigade.
Katkam wa khana kiwa chem nyngkong yeini da ong wa kawi ka Jeep kawa wan na ka thaaiñ Fire Brigade da tyrrah ko ya kani ka Scooty wei da yut wot ko na ini i thaw.
Hawa yaklam wa u Superintendent of Police (Traffic) ka East Khasi Hills, u Bikram Marak da ong u wa ini da jia i heipor 9:50 wei kani ka Scooty kawa wan na ka thaaiñ Dhankheti da chah tyrrah ko ha ka kari wym tipmit kawa wan mar pyrchah.
U SP da ong u leh wa i takit wow yoh kem ya kani ka kari kawa yut dang lai i chakhmat wei ki pulit da chim ki leh wow bichaar ya ki CCTV kiwa em tymbud u surok wow chem ya kani ka kari hanlada ka khubor chawah chaneiñ ong ki wa kani ka kari toh ka Jeep, da ong u leh wa ki pulit ym maap ki ya kiwa emkti wei daw pynchitom ya ki katkam ka aiñ.
Ha iwi tawon i liang u Marak da kyntu u ya waroh kiwa yah kari khamtam heipor miet wow man ki kiwa syndong neibhah wa boonsien kiwa yah hei miet toh kiwa yah smat bha ya ka kari iwa ye wow wanrah hei maa ya kiwi tawon.
Discussion about this post