Ka sorkar jylla da lai ko chaphrang wow kyrriah noh ya ki pulit CRPF wei wow booh noh ya ki ha iwi i thaw wa tikna. Ynne ka sngi ka sorkar hapoh i yahkhmat u Montri Rangabh, u Symbood Montri Rangbah wa u Montri ki Kaam Pohyung da yaklam ki hajrong kani ka phang wa ki heh ka CRPF heiwa da yaklam yillu kammon wow thoh laad neibynta wow kyrriah noh ya kini ki pulit na ini i thaw wa wit ki paidbah.
U Montri ki Kaam Pohyung ka jylla, u Lahkmen Rymbui da ong u wa ka sorkar da bichaar ko leh ya i rukom phah sonteri ya ki CRPF hapoh ki bynta ka nongbah Shillong, wei kamjooh ya i thaw wa tikna wow kyrriah noh ya ki wow man leh kam i thaw sah.
Da ong u wa ki pulit CRPF da man ki kiwa emkaam wow sonteri ya ka nongbah neibynta i chngaaiñ kiwa chong chnong, tangwa kamwa man katni dang hap pynsah ya ki ha kiwa boon ki thaw wei neiliang u Montri Rangbah da chimkhia u wow pynbait tangwa handooh ynne ympu yoh u chim ya kawon kawon leh ka rai.
Kam wow kdaw heini i dawa da slem bha na kiwa boon wow kyrriah thaw sah ya ki CRPF na ki thaw paidbah khamtam neiliang ki paidbah ka Mawlai kiwa ha u bnai wa dadep leh da pynjoor ki yei pyrchah wa em ki CRPF kiwa pynawri khamtam hadien i jia ha i miet ka 15 Naisaphra uni u snem.
