Shillong: Ka sorkar jylla da lai ko chakhmat wow thoohlaad kammon wow pynkyllooid ya ki sarok ka sor Shillong, ynne ka sngi u Chairman ka Meghalaya State Planning Board (MSPB), u Lambor Malngiang da lai pait u ya ka thaaiñ Barik wa Khyndailad khamtam ki thaw wa rap heh yow pynkyllooid ya ka sor.
U Malngiang da lai pait u ya ka yung krehkaam ka PWD kawa em ha Barik kawa em i thaw wa heh wow chna ya ki thaw pynyieñ kari wa boon mala wei u man ko leh kam ka thaw ya kiwa yakhih neibhah ki yakhih dei langær da pynman ha thaw pynyieñ kari ka Additional Secretariat.
Katkam wa ong u Malngiang, ka thaw yieñ kari ha Additional Secretariat man ko kawa khian wei ktah ko leh yei khnñia ka sor.
U Malngiang da ong u wa da phah ya ka tnat wa pait yeini wow pynkhreh ya ka bui hapoh chi bnai wei hadien ini daw leh yeiwa emkaam.
Heijooh i por u Malngiang da lai pait u ya ka thaw pynyieñ kari kawa em mar pyrchah ya ka State Bank of India, kawa man neibynta wow pynyieñ ya ki kari wa bha tangwa da kylla hi-eh ko kam ka thaw kset ya ki phaw tylli ki kali maxi cab kiwa da jæd da pai wei daw phah ya ka tnat transport wow noh noh ya ki.
U Malngiang da ong u wa katkam ka yutip wa da yoh u na ka tnat pynroi sor, em du 20 tylli ki kari wa sih wa da booh ha kani ka thaw. Heipor wa pait kiwa pathai khubor da em palat yeiwa ong u Chairman ka board.
Ya kini ki kari da pynlai da ki bru samen wei ki kari wa da kset wot hadooh ki tyre leh da yap ki, ki light, ki bynta wa chapoh man ki kiwa da jæd wa kiwi kiwi.
Discussion about this post