U montri rangbah ka jylla, u Conrad K Sangma ynne da sdang u ya ka ‘Chief Minister’s Mobilisation Support for Producers’ Program ha Tura hei emlang u MLA ka North Tura u Thomas A Sangma, u MLA ka Williamnagar, u Marcuise Marak wa ki Deputy Commissioner ka West wa East Garo Hills District.
Ka thong yong kani ka Program toh wow jied wow hikai wei wow sdang seiñ ya kiwa pynmih mar kiwa tip kam ki Producer Groups, Service Providers wa Collective Marketing Centers ha kylleiñ ka jylla Meghalaya.
I chna ya ki seiñ daw yarap ko ya ka sorkar wow kynjoh ko ya i thong wow pynku ya i khayi pateiñ, wow pynjanai ya i rukom dai ya ki mar, i kit i bah wa kiwi kiwi.
Hapoh ka Meghalaya Livelihoods and Access to Markets Project (Megha-LAMP), da kyrchaan hadooh 1,260 tylli ki Producer Groups katwa hapoh ka PRIME won da kyrchaan ya ki 936 tylli ki Producer Groups.
Ha ki bnai wow wan, T. 9.4 klur daw pynlait cha ki seiñ hapoh ka Megha-LAMP wei T. 6.1 klur won cha kiwa em hapoh ka PRIME.
Ki dkhot ka Producer Groups u yoh ki ya ka Mobilization Fund wa T. 5,000; katwa ki Service Providers u yoh ki ya ka Mobilization Fund kawa T. 50,000. Katwa ki Collective Marketing Centers u yoh ki ka ram khlem sut namo ka ZERO Interest Loan kawa T. 7,00,000.
Ynne ha Tura da saam hadooh T. 3.5 klur cha ki 90 tylli ki Producer Groups, 21 tylli ki Service Providers, wa 38 tylli ki Collective Marketing Centers.
U Conrad hawa e yei klam da ong u wa ki kaam pynroi toh iwa emkaam bha hapoh ka jylla wei da klam che wa kwah ka sorkar u pynku ya i rukom im ki bru.
Da ong u leh wa deiwa chimkhia ya i emkaam kiwa seiñ kreh pyn daki yaki hi namo ka Entrepreneurship, kamtæ da sdang ya ka CM’s Entrepreneurship Recognition Award wei wow e sikai ya ki ha ki PRIME Hubs.
Da pynbna u leh wa ha ka sorkar jylla daw pynlait ko T. 200 klur ha ki ar snem wow wan hapoh kani ka thong krehkaam wow yarap ya ki warep wa kiwa pynmih mar ha jar jiar ki kyrdan yong ki.
