Kiwa kreh Accredited Social Health Activists (ASHA) Meghalaya da sdang yakhih ki deiwa chongngiah “Taking Rest” ha yung wow dawa pynku ya ka bai bnai yong ki.
Ki ASHA hapoh ka lama Meghalaya ASHA Workers’ Union (MASHAWU) da phah ki ya waroh ki ASHA wow dam u lai kreh nadooh ka ynne ka sngi hadooh ka 6 tarik u Khonchonglad (Nov) 2023.
Kiwa kitkaam ka MASHAWU ynne da yachem ki waka Montri ka chnat i chait i khiah ka Dr. M. Ampareen Lyngdoh wow pynsñiaw ya ka yei chem chitom ki.
Neiliang ka Sony Kharjana, kawa e buit ya ka seiñ da ong ko wa ki ASHA da dawa ki wow pynku ya ka bai bnai yong ki na ka Rs. 2000 chi bnai wei wow yoh myntoi ki na i chah sumaar wa mynkna kam na ka MHIS namo na kiwon kiwon ki Scheme.
Da yaklam leh heiyatoh wa i chah beh kreh ki ASHA khlem iwon iwon i daw heiwa da em ki kattu katni kiwa chah beh kreh ki du neidaw ki kaam samen wa ki waheh chnong.
Neiliang ka Ampareen da kular ko wow chimkhia hajrong i chah sumaar ki ASHA waka chnat heiwa u chim ka chnat ya ki yukheiñ na ki ASHA khnang wow yoh myntoi ki na ka Meghalaya Health Insurance Scheme (MHIS) hadooh 100%.
Da ban joor ko leh wow pynku ya ka bai bnai ki ASHA khnang wow ye ki u myntoi neibhah wa da ku dor ki mar wa emkaam.
Hanlada ym em i kular wow pynku ya ka bai bnai, ka Kharjana da ong ko wa ka Ampareen daw rah ko yeini ha u Montri Rangbah ka jylla, u Conrad K Sangma ha ka 6 tarik u Khonchonglad.
Hajrong ini waroh ka seiñ ki ASHA da rai ki wow chon yung hadooh ka 6 tarik wow ap yeiwa mih na i yaklam wa u Montri Rangbah khnang wow chim ya ka rai sam chaphrang.
Discussion about this post