Seiñ ki 6 ngut ki MLA da ka UPF wow yaklam ya ki kaam pynroi ha ka jylla

Shillong: Ki 6 ngut ki MLA wa em haka sorkar Meghalaya Democratic Alliance (MDA) wa kynthup ya ki 4 ngut ki MLA na ka People’s Democratic Front (PDF), u MLA samen na Nongkrem wa u MLA ka NCP ynne ka sngi da pyntip ki ha ka yung dorbar wa ki em ki ha ka dhab wa da chna thymme, ka United Progressive Front (UPF).

Kini ki MLA da e kti ki leh ya ka chithi wow pyntip cha ka yung krehkaam u Dy. Speaker ka yung dorbar kawa da chimkti da u Joint Secretary ka Meghalaya Legislative Assembly neidaw wa ym em u Dy. Speaker, u Timothy D Shira.

Ki MLA kiwa em ha kani ka dhab kynthup ya u Banteidor Lyngdoh, u Hamletson Dohling, u Jason S Mawlong wa u Gavin M Myllimngap na ka PDF, u Lambor Malangniang (IND) wa u Saleng A Sangma yong ka NCP. Hanlada kini ki MLA da chna ki ya kani ka dhab tangwa ym pu em jied ya uwa yahkhmat.

“I thmu yong ka UPF toh wow nang pynskem chooh chooh ha ka rukom krehkaam wow pynku ya ki kaam pynroi ha ka jylla, daw yaklam i leh wa ka sorkar ya iwa emkaam ka jylla kam ka dhab ym toh de dei yong samen,” da ong u Banteidor Lyngdoh hawa yaklam wa ki laad pathai khubor.

Related posts

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Pdiang ka sorkar yei pynche u Sniawbhalang, ki wym hun ye ki wow lai tih chooh: Prestone

May 21, 2025

Hawa kylli, u Banteidor da ong u wa kani ka dhab toh kawa da ya sñiawthooh yumut nadooh 5 bnai nachwa wei ym em iyi iyi wa wan ki wow pyntipmit hadien i khlaad noh u Lamphang uwa man leh u President ka UDP.

Heiyatoh won wow kyntait wow yasoh wa ka Regional Democratic Alliance (RDA) kawa man ka dhab ki ar tylli ki seiñ ri-loom, ka UDP wa ka HSPDP, neiliang u Banteidor da ong u, “Ki em ki kiwi ki phang wei i sñiawthooh i wa i hap i wow yaklam hi neiliang yong i hanlada man i para seiñ ri-loom.”

Neiliang u Hamletson Dohling uwa man leh u montri ha ka sorkar da ong u, “I seiñ ya kani ka dhab toh wa i kwah i wow pyntikna wa ka sorkar Meghalaya Democratic Alliance (MDA) wa yahkhmat da u Conrad K Sangma u neh ko hadooh wa kut.”

Katwa u MLA ka NCP, u Saleng A Sangma da ong u wow yaklam ya iwa emkaam, emkaam ya ka sur yong uwa boon wei katni kani ka dhab daw rah ko ya ki phang da i sñiawthooh yumut lang yong waroh neibynta wow pynsñiaw ya ka sur ki paidbah.