Ynne ka sngi ka Meghalaya Energy Corporation Limited (MeECL) da thmu ko wow pynman ya i pynsñiaw paidbah namo ka Public Hearing ha Moosakhia, West Jaiñtia Hills hajrong i angnood wow chna ya ka Dam neibynta ka 120 MW Umngot Hydroelectric Project ha ka Wah Umngot.
Kani ka Public Hearing toh kawa da pynbood ya kawa da thmu wow leh ynnin ka 8 tarik ha Siangkhnai tangwa da haap pyndam noh ya ka nei joor ware i pyrchah ki paidbah na ki chnong wa thmu wow leh yeini.
Ynne ka sngi da booh por wow sdang ka pynsñiaw paidbah heipor 11:00 waje tangwa heipor kamwa 10:30 ki paidbah kiwa da poi chwa kiwa na War Jaiñtia khamtam kiwa na ki chnong kiwa em hapoh ka Elaka Darrang chirup wa ki seiñbhalang da sdang ki wow kyr’iaw wow awri wow dawa pyndam ya kani ka Hearing.
Neiliang ki paidbah kiwa da mih da rah ki ya ki kot rben wa thoh ya ki kyntien wow pyrchah ya i thmu wow chna ya kani ka Project wei da sdang ki u kbai wow dawa ya ka sorkar wow pynsangeh ya ini i thmu.
Neiliang ki bor District wa kynthup ya u Magistrate M. Challam wa u L. Kynjing da pyrchang ki wow pynsñiawthooh ya ki paidbah ya i thmu wow pynman ya kani ka Public Hearing deiwa kyrpaad leh ya ki wow chah wow sdang noh ya ka tangwa ki paidbah kiwa pyrchah wa ki seiñbhalang kiwa kynthup ya ka JSU, KSU, HYC, JSM, HANM, FKJGP wa kiwi kiwi da dawa bait ki wow pyndam ya ka.
Hadien kattu katni por da rai noh wow pyndam noh chwa wow pynman ya ka khlem yoh laad wow ap ya kiwon kiwon ki liang.
Kiwa kyrchaan wow chna ya kani ka Project kiwa kynthup ya ki paidbah na ka Moosakhia, Samanong, wa kiwi kiwi kiwa na Elaka Amwi da pynsñiaw ki wa i daw hi wa khroo wa pdiang wei kyrchaan ki ya kani ka Project toh wa daw wanrah ko ya ki kaam pynroi wei ki paidbah leh u yoh myntoi ki na ka.
Heiyatoh won wa i pyrchah na ki paidbah wa ki seiñbhalang ya kani ka Project hi toh wa daw ktah ko ya ka um ha ka Wah Mynngot, kawa daw ktah ya ka ki dakha wa dohum ha kani ka wah.
Da pyrchah ki leh wa deiwa chna ya kani ka Project, boon hi ki bru kiwa imja na ka nadooh kiwa khwe dakha wa kiwa kiñ lieñ kiwa im nei kaam uiñke suwari daw chah ktah bha ki.