Ka All Khasi Meghalaya Tourist Taxi Association (AKMTA), mynta ka sngi ka la dawa na ka sorkar ban khang noh ia ki kali kamai Tourist ba na shabar ban leit sha ki jaka jngohkai kiba don ha ka jylla, bad kane ka kynhun ka la kren shai ruh ba kim khang ia kino kino ki kali kamai Tourist ba na shabar ban kyntiew ia ki nongleit nongwan na Shillong katkum ka por ba la pynbeit.
Halor kane ka jingdawa ka Association la leit buh da ka dorkhast ha u Myntri ka Kam Jngohkai, u Paul Lyngdoh ban kyntu ia ka sorkar ban kan wanrah noh da ka Policy ban nym shah ia kiwei ki kali ba na shabar ban ialam kai ia ki riew shang pyrthei sha ki jaka jngohkai kiba don ha ka jylla. Halor kane, ki nongialam ka Association ki la iathuh ba u Montri u la pan por 2 taiew ban pynbeit hapoh ka tnat bad hadien kata kan don biang ka jingiakren bad ka Association.
U President ka Association, u Ricaldinus Dohling u la iathuh ba kumba ka long mynta ha ka shisngi ki kali kiba wan na shabar ki don hapoh 2000 tylli kiba ioh ban kamai sha ki jaka jngohkai.
U la ong ba ka jingshah ktah ka la jur bha ia ki para nongñiah kali trai jylla, bad wat kiba ioh ia ka Scheme na ka sorkar ki la shah ktah wat haduh ba jynjar ban siew ia ka ram bad ban pynbiang ha ïing.
Na ka liang ka Association ka la ong ruh ba kan sa shong ban iakren halor ka jingdon ki Agent kiba pynbat kali lypa ia ki nongwan jngohkai kaba pynduh kamai pat ia ki trai jylla.
Haba kylli, u Dohling u la iathuh ba ki nongñiah kali kamai Meghalaya (ML) ki iakynduh jingeh wat mynta ruh haba ki kamai tam, namar tang ban shu leit buh nongleit jingleit ha Airport la shah dain kuna haduh 2000 tyngka, katba ki kali na kiwei pat ki jylla ki ioh ban kamai laitlan bad ki pulit ruh kim leh eiei haba ki ïeng ha ki khap sor.
Discussion about this post