Kiwa chong chnong ka Shnongrim, Tongseng, Daistong wa ki chnong wa marjan kiwa man ki tre thaw ha Lum Syrman, Elaka Nongkhlieh iwa man leh i thaw wa ka Shree Cement Limited da thmu ko wow pynman Public Hearing yow tih moochuni, ynne ka sngi da pynman ki yei yalang paidbah ha Shnongrim yow pynche yei klam u Secretary ka Elaka Nongkhlieh wa ki kattu katni ki dkhot ka Elaka ha ka 16 tarik uni u bnai heiwa da ong wa dadep wow su bai lutsan cha ki tre wa em thaw ha Lum Syrman.
Kini kiwa chong chnong da pynche ki wym em kam itæ i su næ yakut wa waroh katkam wa ong u Secretary ha katai ka yalang wa pynman ha Mollasngi.
Chooh chooh da ong u wa i wym chah ya ki seiñbhalang hapoh ka Elaka leh toh ka rai yong ki kattu katni wei ymtoh i rai paidbah næ i rai kiwa chong chnong ka Elaka.
Kamtæ neiliang ki tre thaw wa kiwa rep da ong ki wow yieñ bait ha ka yurim yow dawa yei hok yong ki wei u pyrchah ya ka Public Hearing ka Shree Cement Limited kawa daw pynman ha ka 22 tarik uni u bnai.
Da kyrpaad joor ya ka sorkar Meghalaya kawa hapoh i yahkhmat u Conrad Sangma wow lai takit bha na ki tre thaw yow tip ki yeiwa sakhiat hachwa wow lai chakmat yow pynman ya ka Public Hearing.
Da ong leh wa lada ka sorkar u pynlai bait ko ya ka Public Hearing daw jia i mynsoo mynsnaam ha katai ka sngi neibhah kam ki tre thaw wa kiwa rep ym hun ki wow dooh yei thaw yong ki kamwa dadep ki wow booh ujor ha kiwa boon.
Discussion about this post