Hadien wa jia wa wan thombor ki damok na Bangladesh kiwa da psiah cha Meghalaya lyngba ka South West Khasi Hills hei step synyaaw ka 8 tarik, ki pulit ka Nonghyllam da kdong ki ki heiwa da hap wow siat ar kuli cha suiñ tangwa kini ki damok wa em kamwa 9 ngut da yoh ki wow yut chapoh khloo.
Katkam ka khubor na ki pulit, ynnin ka sngi Thohdieñ heipor kamwa 2:15 i sngi da pyntip cha ki da u tre iwi i thaw wa da yoo u ya ki damok wa rah tiar pynmynsoo ha ka thaaiñ Khunjoy, wei da suba wa kini toh ki Bangladeshi kiwa da psiah ha kpær yong oo.
Kamtæ neiliang u Officer In-charge ka Nonghyllam deilang ki pulit da hiar ki cha katai ka thaw heiwa manda yoo ya kini ki damok, u OC da phah u ya ki wow sangeh heiwa da siat leh ar kuli cha suiñ yow pyntieñ, tangwa ym em sangeh ki wei da yut ki chapoh khloo.
Da khana wa kini ki Bangladeshi da rahlang ki wa ki tiar pynmynsoo wei i kynreh ya kani ka thaw dang pteiñ i hadooh kattæ yow chem ya kini ki bru.
Hapyrdi i kynreh ki pulit, da pyntip leh wa kiwa chong chnong ka Khunjoy-B da yoh ki wow kem ya uwi na kitai ki damok.
Kam wow pynkynmoo biang heini wa heipor step synyaaw ka 8 tarik, kini ki Bangladeshi da lai thombor ki ha ka chnong Rongdangai we da siat kuli ki leh cha suiñ, wei ha ini i thombor uwi u bru uwa 21 snem i rta uwa tip pyrtuid kam u Balsrang A Marak da mynsoo joor u.
Da pyntip leh wa kini ki damok ha katai ka step synyaaw da lai psiah ki ha iwi i yung deiwa pynyang Pistol ya u Marak wei da paan ki ya u Phone Number ka tre dukan wa kreh u. Hadien ini da kdoh ki ya u Balsrang da ki Hatkari wei da yah ki oo cha ka chnong New Rongdangai.
Ha ini i por wa dang lai yah ya u Balsrang, kini ki damok da yaklam ki para ki wow ah oo na rdang wei katwa dang lai ki da em kamwa 6-7 ngut na ki kiwa lai rap suki wei ha ini i por u Balsrang Marak da chim kabu u wow phet lai psiah ha kawi ka yung ha New Rongdangai, tangwa kini ki damok da yoh ki wow psiah ha katai ka yung wei da dat da bom ki oo hadooh wa da mynsoo joor.
Puræ leh: Chem ya ka ID pulit ka Bangladesh, ka Combat Vest hadien wa chah dung uwi ha Meghalaya
Discussion about this post