U SP ka West Garo Hills, u Vivekanand Singh Rathore ha ka kyrwoh wa da phah u ynne ka sngi da pyntip u wa hadien wa ki pulit yoh yutip ki wa em ki bru wym tipmit wa uiñ deilang wa ki suloi (Sophisticated Wepaons) ha ka thaaiñ Daldagre ha ka 14 tarik uni u bnai. Da pynman yei thooh ya kini ki bru wei da booh leh ya ki thaw pynsangeh kari ha kiwa boon ki thaw.
Heipor 7:30 i miet ki pulit wa em ha kawi na ki thaw pynsangeh kari ha u sarok wa lai cha dong Daldagre, Tura da yoo ki ya uwi uwa yah thuk-thuku wa wan neiliang ka Tura-Garobadha Main Road wei hadien wa yoo u ya ki pulit da hiar u na ka thuk-thuk wei da sdang u wow siat ya ki pulit. Neiliang ki pulit leh da siat kylla ki heiwa uni da toh kuli u wei da khlaad u pyn ha ini i thaw.
Hadien wa wan lang ki arngut ki Executive Magistrate ha ini i thaw, da pynman yei thooh heiwa da chem ya kawi ka AK-56 Assault Rifle, uwi u AK Rifle Magazine, 19 tylli ki kuli 7.62 mm ki wym pu pynemkaam, kawi ka Bajaj Platina (rong yong) kawa khlem Number, kawi ka Helmet, 5 tylli ki tdong kuli 7.62 mm wa thylli wa 20 tylli ki tdong kuli 9 mm kiwa thylli.
Hadien wa leh yeiwa emkaam, da kit yei metyap cha Tura Civil Hospital Morgue yow leh ya ka Post Mortem.
Ya uwa khlaad da tip kam u Robinson R Marak uwa na chnong Raksamgre wa dang haap hapoh ka Tikrikilla PS, West Garo Hills.
Da pyntip leh ya ini wa jia cha kiwa ha yung hasem heiwa kattæ da chem toh uni toh u wakreh (Over Ground Worker) ka UALA wa ka ASAK kiwa man ki seiñ kieñ suloi kiwa krehkaam nadooh 2014 hadooh 2018.
Hadien kini ki por, uni u bru toh uwa da embynta ha ki kaam dawa poisa, u rah bor ya ki bru wa kiwi de kam kini ki jait kaam ha West Garo Hills District.
