Kawi ka manyung wa em soo ngut kawa na Kerala kiwa da sah California, USA da chem wa da khlaad noh ki waroh haka 13 tarik uni u bnai heiwa da suba da leh yeini da u kurim uwa sait leh ya idæ.
I chnong wa sah ki toh iwa tip kam ka San Mateo, California wei u manpa toh uwa tip kam u Anand Sujith Henry (42), ka manbei toh ka Alice Priyanka Benziger (40) wei da em ki leh ar ngut ki khon chynrang wa kha bynrap kiwa dang soo snem i rta.
Ki pulit da lai ki cha ini i yung wa sah ki ha i thaw wa tip kam i Alameda de las Pulgas kamwa jooh leh hi ki yow pyntikna wa waroh i jait biang hi i tangwa manda poi ki ym em wa wai yung wei ym em chem ki leh wa em wa psiah yabor chapoh wei ki pulit da yoh laad ki u psiah chapoh lyngba kawi ka khian dwar wa mylliñ u khang.
Ki pulit da chem chwa ki yei metyap u Anand waka Priyanka ha kamra sum wei waroh em kha chah siat ki wei da chem leh yaka 9mm Pistol wa u Magazine wa em kuli.
Ki khon won ki da chem ha thaw thiah ki wei da suba wa da yap ki deiwa chah pyndooh sanget næ deiwa chah e bih neibhah ym em dak wa chah dat chah pynmynsoo ki.
I takit ki pulit da chem wa u Anand da kwah noh u wow yalait noh waka Priyanka wei da lai u cha ka yung bichaar yow leh yeini ha u Kmaichonglad (Dec) 2016 tangwa ini i kaam ym ye wow pynkut ki wei ki pulit leh jooh lai ki cha ini i yung heipor wa chah Phone yow lai yarap.
U Anand waka Priyanka toh kiwa kreh IT wei da sah ki ha USA la 9 snem wei waroh ar man ki kam ki Software Engineer heiwa u Anand toh uwa jooh kreh ha Google wa Meta katwa ka kurim toh ka Data Science Manager ha Zillow.
Da man ki leh kiwa mankhih mankhan wei sah ki leh ha i yung wa chongdor $ 2.1 Million.
Da suba wa u Anand ye u man wa leh yeini waroh wei hadien wa tynyap u ya ki khon u da lai siat yap u yaka kurim dep tæ siat u ya idæ.
Discussion about this post