U National Vice President ka National People’s Party (NPP), uwa man leh u Symbood Montri Rangbah ka jylla, u Prestone Tynsong da ong u wa ha u snem 2018 ki bru ong ki sma Garo, ka NPP toh ka Party Garo wei u Sniawbha, u Ngaitlang wa u Prestone da ong ki wa lait nei chah synchaar ha u Garo lai ngam biang hi ha u Garo.
Tangwa katni hapoh i yahkhmat u Conrad Sangma, ka NPP ka Meghalaya da man ko kawa yatylli kam kawi. Da ong u wa lada em ar tylli ka Meghalaya ye phi wow ong Garo ne lada em ar tylli ka Meghalaya ye phi wow ong Khasi, tangwa hawa em kawi mut wa du kawi iwa mut wym ye u tympiah ya ka.
U Prestone da ong u leh wa sñiawsuk wa ya ki manchwa kiwa da lai noh ka u Hopingstone, u Cliford Marak, u PA Sangma wa ki ong ki kwah Khasi State, kwah Garoland wei itæ hadooh katni dang em hi ha kiwa yahkhmat, tangwa i sakhiat toh wa ka jylla dang khian palat wei ym toh iwa suk wow yoh jar jiar ka jylla.
Da e nongmuna u ya ka Uttar Pradesh kawa em da ki spah ngut ki MLA, deiwa ong wa ka sorkar India hap ko wow kheiñ yukheiñ wot lada kwah ki wow phiah. Da ong wa kam ka jylla Meghalaya, u BB Lyngdoh uwa man uwa yahkhmat wa khroo ka jylla da ong u wa iwa khian toh iwa yoosuk tangwa kat dang khian lat dang ya piah.
Uwa yahkhmat ka NPP da khut u wow yieñ tylli kam kawi deiwa ong wa ka NPP ka yieñ ko neibynta ka jylla Meghalaya wei ka yieñ ko leh neibynta ka thaaiñ North East waroh kawi.
Ha iwi i liang u Prestone da ong u wa ka thong yong ka NPP man ko wow jop boon tam ha u 2023, wei da pyntip u wa hadooh katni du ka APHLC kawa jop boon dooh samen itæ ha u snem 1972, lait neitæ ym em de wei ki sorkar wa wan hadien toh kiwa da khleh ja lang.
