Shillong: U MDC wa thung donhi (Nominated) ha KHADC uwa man leh kam u Working President ka UDP, u Bindo M Lanong da chim smai u ynne ka sngi, wei ya u Bindo da pynsmai da uwa bichaar ka KHADC, u S. Kharsyiemlieh hei emlang u CEM u Teinwell Dkhar, u Chairman u Pynshngain N Syiem, ki EM, ki sahep wa kiwa hayung hasem yong oo.
U Bindo da chah jied u kam u MDC kamwa 7 sien wei ha kini ki ynru sien chwa da ksoh u yei kaam kam u CEM, u Chairman wa uwa yahkhmat ya ka liang pyrchah, tangwa ynne da chah thung u kam u MDC da kyntait u wow chimkti ya kawon kawon ka kaam lait noh ya ka kaam Chairman ha ki Committee.
Hawa yaklam wa kiwa pathai khubor hadien wa da smai u, u Bindo da ong u wa hei sakhiat da em ka yaklam neibynta ka kaam MP Rajya Sabha yeiwa da kyntait u.
Hawa kyruiñ won cha ka KHADC da ong u wa iwa kongsan dooh toh neibynta wow pait bniah heiyatoh wei thmu wow pynkylla ya ka Sixth Schedule neibhah ini man ko kawa kongsan tam wow em 40 ngut ki MDC wa na kini soo ngut toh ki wow thung donhi heiwa ar ngut na ki toh ki kynthai.
Discussion about this post