Jowai: U Octomewot Lamin, District President WJH ka Party NPP hadien wa da jied ya oo kam u Nominated MDC deiwa mynjur lang waroh ar ka JHADC waka sorkar jylla wa yahkhmat da ka NPP, ynne ka sngi da baam smai u hakhmat u Chairman ka Council u Lakhon Biam ha ya sakhi lang u MLA ka 2-Jowai u Wailadmiki Shylla, u CEM ka JHADC u Thombor Shiwat, ki MDC wa kiwi.
Hawa yaklam wa kiwa thoh khubor hadien wa chim u yaka smai da ong u, “Lada yaklam chaphang ki kaam wa hap kreh, man ki ki jooh hi kamwa da jooh yaklam nadooh ki por wa lai yalap Election kam u District President, tangwa kani won da man ko ka kaam wa thymme ya nga wow yoh u embynta lang wow ya krehlang wa ki MDC kiwa i jooh embynta lang ha ki por yalap Election”.
Lyngba ini i yoh u wow man kam u dkhot ka Council, kwah u wow yoo yaka chait ka khiah yong ka heiyatoh waka yarong poisa, hei wow thooh laad ya kam ki Megaproject yow lait chaniah du ha kawi donhi ka rukom pynmih poisa khnang wa lada tlot i mih na tidiang daw kyrchaan won i mih wa na timun wei lada ye ha kani ka rukom, ka yarong ka Council daw chait daw khiah ko wei ka roi ka paar leh daw wan ko.
Kam wow pynkynmoo, u Octomewot Lamin toh uwa sah ha chnong Mihmyntdu uwa em kamwa 46 snem i rta wei da dep puræ u yaka kyrdan Diploma haka Automobile.
Da psiah u cha ka kaam saiñ hima sima da boon snem heiwa nyngkong da kreh u haka Party NCP wei heipor wa mih u naka NCP da ksoh u yei kaam District President. Neitæ won haka Party NPP da em u nadooh wa sdang wei katni da ksoh u yaka kaam u District President ka WJH.
Neiliang u CEM u Thombor Shiwat da pyntip u wa katni ka liang synchaar da em ko 25 ngut ki MDC wei deiwa psiah u Octomewot da ku cha ka 26 ngut.
Discussion about this post