Shillong: U MLA samen na Nongkrem Constituency uwa man u dkhot ka dhab United Progressive Front (UPF), u Lambor Malngiang da ong u wa ka UPF man ko kawa smat wow chimkti ya ka chuki Lamphang ha ka yung dorbar, wei chwa wow lai ha ka yachem lang ka dhab yong ka sorkar Meghalaya Democratic Alliance (MDA) ka UPF daw chong yalang chwa ko wow pyrkhat ya kani ka kaam.
Katkam i ong u Malngiang ka UPF kawa em 6 ngut ki MLA wa kynthup ya ki soo ngut na ka seiñ People’s Democratic Front (PDF) u MLA wa samen ka NCP, u Saleng A Sangma wa u Lambor da ong u wa lada em i tyrwa ka dhab ym kyntait ko yeini wei u Lamphang toh u wow pdiang leh da ka MDA.
Hawa kylli lada ka UPF daw tyrwa ko yei pyrtuid u wow chimkti ya kani ka chuki hadien wa khlaad noh u President ka UDP, u Malngiang da ong u wa kawon kawon ka dhab kawa em ha ka sorkar ye ko wow tyrwa ya u bru yong ka hi, tangwa ka UPF daw pyrkhat ko yeini.
Da ong u wow rai ya ka chuki ym man ko kawa suk neibhah wa emkaam da u bru uwa chemphang wei uwa sñiawthooh yei kaam wow pynneh ya i burom yong ka yung dorbar. Chooh chooh da ong u wa ka kaam yong u Lamphang ym chong ko du hapoh kani ka jylla tangwa haap mihkhmat leh cha baar ri kam ha ka yalang ka Commonwealth, wei man dkhot u leh ha ka Speaker’s Association hapoh India.
Ha iwi i liang u Lambor da kyntait u leh wa em i taan tylle wow yoh ya kani ka chukhi hapyrdi ka UDP wa ka UPF, tangwa da ong u leh wa waroh ye ki wow pynsñiaw ya jar jiar i sñiaw yong ki wei ka rai wa khaddooh hi toh yong ka MDA.
Discussion about this post