Ka BJP kam chibynta wow pynkhreh yow pynneh ya ka Party hei bor ha Delhi, da pynkhreh ki ya ka MP Election ha u snem wow wan wei da mih leh i pyrtuid ki kyrtong nadooh u Montri sorkar uwa man leh kam u MLA ka Pynthorumkhrah, u Alexander Hek Laloo wow yieñ yaleh na Shillong Constituency katwa na Tura Constituency won da mih i pyrtuid u MDC wa katni uwa man leh kam u Vice President ka Party, u Bernard N Marak.
U Hek wa u Bernard da pynsñiaw ki yeiwa da man kiwa da khreh wow yaleh Election lada khut ka BJP ya ki.
Neiliang u Hek da pynsñiaw u yei man uwa da khreh wow yaleh Election kamjooh leh u Bernard kiwa da ong wa chong hei mon ki heh ka Party.
Lada pynyaleh da u Hek na Shillong, daw hap u wow yaleh pyrchah ya u MP wa katni u Vincent Pala kam u kyrtong ka Congress neitæ u Dr. Jemino Mawthoh naka UDP wei da mih leh ka khubor chawah chaneiñ yei pyrtuid u President warim ka HYC uwa man leh kam u Muktiar, u Robertjune Kharjahrin.
Ka VPP toh kawa da dep pynbna yei pyrtuid u Dr. Ricky Syngkon katwa ka NPP won ym pu em pynbna kyrtong ko tangwa i pyrtuid u MLA warim u Himalaya M Shangpliang da mih ka khubor wa ye u man kam uwa hakhmat.
Na Tura lada yaleh u Bernard daw hap ko wow knieh yei bor nei kti ki Sangma kiwa da ksoh ya kani ka Constituency nadooh i por u Purno A Sangma, neitæ u Conrad K Sangma wei katni ka Agatha Sangma.
Kiwi kiwa da pynsñiaw wa kwah wow yaleh Election toh ka MLA warim ka Willamnagar kawa man leh ka heh Congress, ka Deborah Marak kawa da jan jop ya ka MP wa katni ka Agatha Sangma ha ka Election MP wa khaddooh.
Discussion about this post