U President ka United Democratic Party (UDP), u Metbah Lyngdoh uwa man leh u Lamphang ka yung dorbar chna aiñ ka jylla da pyntip u wa u Lat ka jylla, u Satya Pal Malik uwa da pyntikna u wa sñiaw yahaap u hajrong i wanrah ka jylla ya ka Meghalaya Residents Safety and Security Act (MRSSA), tangwa da pyntip u leh wa u Lat dang emkaam u wow bichaar bniah wa ka MRSSA ym tyngkhooh ko wa ki aiñ ka sorkar pyrdi.
Ynne ka sngi neiliang u Metbah ryngkat ki kiwa yahkhmat ka UDP da lai yachem ki ya u Lat ka jylla wow yaklam hajrong kiwa boon ki bynta kiwa kynthup ya ka MRSSA, ka Inner Line Permit (ILP) wei wow yaklam hajrong ki aiñ wa dang tyrwa namo ki Bill kiwa dang sah hadien wa pdiang ya ki da ka yung dorbar chna aiñ ka jylla.
Neiliang u Lamphang da pynsñiaw u yei mynsien wa kmen hadien i yachem deiwa ong wa neiliang u Lat da pynyoo u yei sñiawthooh ya ki aiñ ka jylla wa thmu u pynkrehkaam.
Heiyatoh won wa ka Inner Line Permit, u Metbah da pyntip u wa neiliang u Lat da klam che u wa ini i kaam toh i yong ka sorkar pyrdi, wei daw lai u cha Delhi wow pynsñiaw yeini ha u montri ki kaam pohyung ka ri (Home Minister), u Amit Shah yei dawa ki paidbah ka jylla.
