U MDC ka Muthlong Sohkymphor u Lomris Lyngdoh da pynsñiaw u yei sñiawdiaw yei eh kiwa ka JHADC da yachem ko, khamtam hawa yatoh waka tulop yong ki wakreh wa da sahkut hadooh 8 bnai kttu wei ini da booh ko hei eh yaki khamtam ha kam ini i por waka pyrthai waroh kawi da maad ko yei eh naka khlam COVID-19.
Kamtæ hajrong ini, u MDC da kyntu u yaki MLA ka Jaiñtia Hills wow yaklam wa u Chief Minister wow pynlait noh ya i bhah ka Council kawa dang sah waka sorkar jylla wow e laad leh ya ka District Council wow pynkrehkaam lut ya ki bor ki wa da pynkup khlem da kdoh da khoom kamwa man katni yow krehkaam katkam i thmu ka Council iwa ka jylla ym e laad ko iwa da booh yei eh yaka Council.
“Kamtæ hajrong ini nga pynsñiaw O ya ini neibhah nga kam uwa mihkhmat wa emlang hapoh ka Council, nga tieñ O wa yoh ka District Council yong i u dooh noh ko neidaw da duna poisa ka Council yong i, neibhah waroh i tip i lada ka District Council yong i u dooh noh ko, ka jaitbru yong i leh ye ko wow dooh noh.”
Da ong u leh wa sñiawdiaw u yei wym kitkhia lang ki MLA na Jaiñtia Hills hajrong ini i bynta deiwa kyntu leh yaki paidbah wow man kiwa bichaar chwa wow jied ya ki MLA neini chakhmat wow jied ya ki MLA da kiwa em yutip yaka District Council neibhah kamwa man katni, kini ki MLA ym tip ki yaka aiñ ki kyndon ka District Council iwa pynman ya ki MDC wa yahkhmat ka Council du kam ki wakreh neibhah ha chwa wow leh ki iyi iyi leh toh u yoh bor na ki MLA.
Da pynkut u MDC deiwa kyntu ya kini ki MLA yong i wow yarap yaka District Council wei wow e laad wa ka Council u pynkrehkaam lut ko yaki aiñ ka Council neibynta i myntoi ka Council waka jaytbru hi waroh kawi.
