Ka FKJGP-Khliehriat Circle dap ko dei sñiawkhia hajrong i mih roi ki dukan kiad namo ki Wine Store hapoh East Jaiñtia, deiwa ong wa kopsar ym em de u pynkhor ya ki kyndon iwa booh leh hei maa ya ki khynnah khynroo ka thaaiñ.
Ka seiñ da phylla ko leh wa katkam ka jubab RTI wa da yoh ha ki kajiak sngi, du ha Ladrymbai kawa man ka chnong kawa khian em hadooh 35 tylli ki dukan kiad.
Ha Mokhep kawa man ka chnong wa rap khian chooh em hadooh 12 tylli ki dukan kiad, ha Dienchynrum hadooh 9 tylli.
Heijooh i por ka seiñ da ong ko wa ka chnat Excise ym em u booh kyndon ko katwon u jngai hapyrdi ki dukan wei ini da pynman i ya ki dukan kiad wow roi ki kamni.
Neiliang ka seiñ kyrpaad ko leh na ki Waheh Chnong wa ymtoh de u e NOC kulmar khamtam hei wow wai ya ki dukan kiad neibhah lada boon kini ki dukan daw booh i hei maa ya ka mynried ki khynnah khynroo wa ya ka imlang sahlang waroh kawi.
Heijooh i por da maham ko ya ka chnat Excise wa ymtoh de u e ko ya ki License thymme ha ki chnong wa da boon kini ki dukan.