Ha kawi na ka lai kynreh wa heh dooh wa da pynman palat ar tayaw ha ka jylla Himachal Pradesh, ki sahep ka Central Bureau of Narcotics (CBN) da lai pynsih lai tympra ki ya 1032 Hectare i thaw wa rep bhang pyrchah ya ka aiñ.
Ki bru ka CBN deilang wa ki bor District kamjooh ka chnat Forest da lai pynman ki ya ka sorjamin ya ki thaw rep bhang wei da pynman leh yei pynsñiawthooh paidbah yow klam chaphang i ktah i dih ya ki jait wa pynmuaid yei doh i pran ki khynnah wa kiwa da khynroo.
Da khana leh chaphang ka aiñ NDPS Act heiwa ki dorbar chnong da chim ki ya ka rai wow tympra lut ya waroh ki thaw rep bhang wei da chimbynta lang ki leh hawa lait tympra ya kini ki thaw rep bhang.
Yow poi cha kini ki thaw rep da hap wow ku riat hapyrdi u slap wei kini ki thaw da em ki hadooh 11,000 phut na sla duriaw .
Ya ini wa da leh da tip kam ka “Mission Crackdown” wei daw pteiñ ya ka.
Ka Central Bureau of Narcotics (CBN) man ko ka chnat wa ha khlieh dooh wow pait ya ki kaam wa yatoh wa i drug hapoh ka ri wa em hapoh ka Department of Revenue, Ministry of Finance ka sorkar India kiwa da pynkit leh wow lai tympra ya ki thaw rep bhang kamjooh u Opium.
Ka CBN da dep ko wow leh ya ini i jooh kam ha ka jylla West Bengal, Jammu & Kashmir, Arunachal Pradesh, Manipur, Uttarakhand wa kiwi de heiwa da dep wow tympra 25,000 Hectare i thaw rep bhang wa Opium ha ki snem wa da lai heiwa wa ha uni u snem ka CBN da dep ko wow tympra kamwa 3,600 Hectare ki thaw rep Opium ha Arunachal Pradesh ha u Thohlakhmi wa Wisu uni u snem.