Jowai: Kiwa yahkhmat ka All Jaiñtia Muster Roll Workers & Labour Union hei yaklam wa kiwa thoh khubor ynnin ka 9 tarik u Kmaichonglad, chi bynta pynsñiaw ki i sñiawngooh yaka sorkar wa hadien i yakhih ha u snem wa dep, ka sorkar da pynku ko yei nongsngi yong ki cha ka T. 300, tangwa han kattæ leh pynsñiaw won ki i diaw neibhah kiwa boon hi i dawa dang sahteñ ki hadooh katni nalor wa kam ki wakreh Muster Roll chah khñion beiñ ki ha kiwa boon rukom.
I dawa wa sahteiñ kynthup yaka Meghalaya Regular Casual Worker Scheme 1996, kawa batai che wa kitu ki Muster Roll wa kreh wym duna 10 snem toh u wanrah chaki Regular Casual Worker, tangwa ha ri-loom Jaiñtia neiliang ki sahep sorkar wa em haki chnat krehkaam waphær waphær da pyndooh ki yei hok ki wakreh Muster Roll neibhah wym em pynkrehkam ki, hanla neiliang u Principal Secretary Labour Department u D.P. Wahlang da klam che u wa toh u yoh ya katai ka Scheme, ong u K.L. Pariat President ka All Jaiñtia Muster Roll Workers & Labour Union.
Ong haroh u wa i yongsakhiat hi kitu ki Regular Casual Worker wada kreh slem lada em ki kaam wa lait kam haki Grade IV ki toh u yoh bynta ki.
Neitæ i dawa na ki Muster Roll wym jooh yoh chim chuti ki hawa kjut chitom kamwa yoh kiwi won ki wakreh sorkar, hawa yoh khon ki manbei, ym jooh yoh chuti ki næ iwon iwon i myntoi kat dang toh i por wow pait u sumaar yaki khon.
Chooh chooh kyntu ki wow su yaki tulop wa sahteiñ yong ki Muster Roll kamjooh kiwa chet ja sngi næ Midday Meal Cook, wow su leh yaka Arrear wa sahteiñ ki Muster Roll, la kammon kammon chwa ka Christmas khnang yow yoh pyndap ki yei emkaam khamtam wada jan i por wow su bai skur khon neibynta u snem 2020.
Kawi kawa rap pynkhyrngiat yaki toh wa ha ki kajiak bnai yoh yutip ki wa neiliang ka 5th Revise Pay Commission ka sorkar Meghalaya, nadooh ka sorkar warim da mynjur wa yaki Casual Worker u su du 11 bnai donhi, kamtæ dawa joor ki yaka sorkar wa katni wow dam u pynkrehkaam deiwa pyndooh pyndam syndon.
Heiyatoh won wei chah khñion beiñ ki wakreh Muster Roll ha Jowai Polytechnic deiwa chah ah nong wot haki sngi khroo yong ka ri kam ka Republic Day, Independence Day waka sngikha u Mahatma Gandhi heiwa kiwa boon ki Muster Roll won haki chnat waphær waphær yoh nong ki, da pynsñiaw ki yei pyrchah joor hajrong ini deiwa ong wa hei yongsakhiat hanla toh ka sngi chuti leh ym toh won u chah ah nong, neitæ won le sien ha man ka chi samoi leh chah ah nong ki katwa kiwi won ki Muster Roll ha kiwi ki chnat krehkaam sorkar wym em kam itæ, lait noh du lada dam kreh ki, neitæ won nalor wa man ka sngi Saturday waka Sunday kitu wa em hapoh ophis chah ah nong ki.
“Ka aiñ sorkar ong ko wym toh u kreh palat 8 kynta chisngi wei lada kreh tam toh u yoh yei su nong wa tam, tangwa ha Jowai Polytechnic won hanla hap ki u kreh palat yei por leh ym jooh yoh ki yei nong wa tam,” pynrap u K.L. Pariat.
Hajrong ini da pynrem joor u ya u Principal katai ka thaw puræ wei ong wa ki wym sñiawthooh ki hajrong ini wei da dawa haroh ki wow yoh i pynche heiyatoh i chah lehbeiñ ki wakreh ha Polytechnic.
Da chim haroh ki ka rai wa lada wym yoh ki yei dawa wym banse ki wow pynman daka Peaceful March ha Shillong haka 17 tarik u Kmaichonglad (Dec) 2019.
Hei yatoh wa kiwa chet ja sngi næ Midday Meal Cook, u K.L. Pariat ong u wa lada u Chief Minister, Conrad K Sangma wym pyndep u yei kular wow yaklam yei eh yong ki wa u Prime Minister ka ri u Narendra Modi, kamta ha u Duiatra (Jan) 2020, ka seiñ daw phah ko dei thoh ko cha u Modi cha u Minister HRD wa cha ki MP ka jylla Meghalaya neibynta u yarap ki yei hok kiwa chet ja sngi kiwa yoh T. 1000 chibnai wow pynku chaka T. 5000, nalor i yarap heiliang i chait i khiah, wow yoh yei yada wei u pynkrehkam daka LPG Cylinder hawa chet wa kiwi kiwi.
Discussion about this post