Shillong: Kiwa yahkhmat ki chnong hapoh ka Synjuk ki Nongsynshar Shnong ka Bri Hynñiewtrep (SNSBH) da kyntu ko ya u CEM ka KHADC wow yachem biang ya u montri rangbah ka jylla u Conrad K Sangma ha chwa ka dorbar wow wan wow yaklam biang ya ka aiñ chna yung.
U Rapiong Blah u Secretary ka SNSBH da ong u wa hadien wa ya ka sorkar thymme da pynsñiaw u yei chitom ki paidbah neibhah ka aiñ chna yung ka MUDA næ ka Building By-Laws, wei ha katai ka yalang da rai wow pynneh bait katkam ka aiñ Town & Country Planning Act 1973 kawa da klam che kdar wa ka aiñ chna yung ka MUDA u krehkaam ko ha waroh kawi ka jylla, laitnoh ha ki thaw wa haap ha ki le tylli ki District Council.
“I sñiawthooh i wa em i ha ka Seismic Zone Five, wei i emkaam wow chna i ya ki aiñ neibhah wei ym kwah wow em i yung i thaw wa oor iwa ye u wanrah yei dooh yei mynsien bru wei yeini ki District Council ki da biang ki ya ki aiñ chna yung wei ka sorkar toh u pynmih noh ko ya ka hukum wa ha ki thaw wa haap hapoh i pait ki District Council toh u pynkrehkaam da ka aiñ ka Council,” da ong u Secretary ka SNSBH.
“Kattu la 6 bnai da yoh ya ka sorkar thymme, tangwa hadooh katni nadooh wa yaklam waka sorkar ym pu em leh ko iyi iyi leh yeini,” da ong chooh chooh u Secretary.
“I kwah i wa ka sorkar u yaklam ko ha ka yung dorbar wow pynkut noh chi syndon yeini i eh heiyatoh waka Building By-Laws,” da ong u.
Da ong u leh wa kamwa man katni khamtam kitu wa chong ha ki khap sor ki chem chitom ki neibhah wa dang chah pyndik ki wow yoh Occupancy Certificate, haap ki wow lai cha ka PHE wei kamjooh leh cha ka MeECL yow paan bor wow riñ um kamjooh ka bordiñ.
Discussion about this post