U MDC ka Jowai Central, u Awhai Andrew Shullai hawa klam hapoh ka dorbar mang tangka, da ong u wa sñiawkhia u wa pai ka yuhe ka JHADC, wei yeini da ong u hadien wa klam u hajrong i rukom lait tooh ka poisa (Leakage) ka Council hawa yañia hajrong ka Mang Tangka ka Council ynne ka sngi.
U Andrew da ong u wa i thaw wa lait poisa bha ka Council toh na ki karkhana pynmih khyndaw-bilat neibhah ym tipsap katwon ki mar pohkhyndaw kam u mooyong wa moochuni wa pynemkaam ki. Da ong u wa nachwa jooh em ki bru ka Council (Checker) wow kheiñsap yei psiah ki mar pohkhyndaw cha kini ki karkhana tangwa katni won ym em de u ye u kheiñsap yeini iwa da wanrah ya i dooh wa khroo ya ka Council.
Chooh chooh da kdaw u ya ki Working Scheme wow pam dieñ heiwa katkam ki kyndon ye u pam dieñ du nei thaw wa heh kamwa 5 Acre tangwa da pam won dei yong 50 Acre. Da e nongmuna u leh ya ki dieñ cha Treriat (Jowai) heiwa da syllen lut ki loom.
U Andrew da pynbaad u leh wa kam ha Mookyndur haka Check Gate heiwa da e ya ka cha uwa paan thied du Rs. 20 lak katwa u bru wa paan thied Rs. 70 lak da chah kyntait u wei kam ini da wanrah i yei dooh wa khroo ya ka Council.
Heijooh i por da ong u wa lada kyruiñ cha ka KHADC du nei ye ko wow khrong dan wa kiwi ki kaam wow pynmih poisa, da ye ki wow pynman yaka tamasa kam ka Monolith Festival katwa heini ha JHADC won nei dooh da chah klam beiñ ko liang wanang.
Da kyntu u leh ya ka Executive Committee wow thooh ki laad kammon wow ye u pynmih poisa khnang wow man ka Council kawa dap wa biang.
Discussion about this post