U Montri Rangbah ka jylla, u Conrad Kongal Sangma da pynsñiaw u yei sñiawkhia hajrong i emkti ki khynnah khynroo ha ki kaam pyntieñ, heiwa da ong u wa kam kini da jooh jia ki, tangwa da ong u wa emkaam wa ka sorkar u wailaad ko ya ki khynnah khynroo wow lait ki nei cha yahbakla.
Da ong u wa ha ki klam wa dang dep ki yong oo, da pynsñiaw u wa ka thong kawa eh wa ka sorkar da booh ko toh wow wailaad neibynta ki khynroo yong ka jylla, wei u pyrchang katwa ye u leh neibynta ki khynroo khyllood.
Hawa yatoh wa i pynemkaam yong ka HNLC da ki khynnah khynroo kamwa da jia nei yoh kem ya uwi u khynnah wa dang hapoh 18 snem i rta hajrong i suba wa emkti wow tympdung Bomb ha Khyndailad. U Montri Rangbah da ong u wa ini toh iwa hap wow chimkhia bha wow pyntikna wa kam kini ym toh de wow jia ha ki por wow wan.
Heijooh i por da ong u wa neiliang ka sorkar daw pyntikna ko leh wa kitu ki bru kiwa emkti ha ki kaam daw chah kem katkam ka aiñ.
