U Montri Khynnah ka sorkar pyrdi wa pait ya ka chnat Law and Justice, u Prof. SP Singh Baghel ynnin ka sngi da yachem u wa ka Meghalaya State Legal Service Authority deilang wa ka Bar Council ha Shillong heipor wa wan u cha ka jylla.
Hawa yaklam wa kiwa thoh khubor hadien ka yalang, u Montri da khana u wa katkam wa phah da u Prime Minister ka India, ki Montri ka sorkar pyrdi toh u lai ki cha ki jylla ka Northeast yow pait yei rukom pynkrehkaam ya ki Scheme ka sorkar India, deiwa lai cha ki thaw wa pynkrehkaam ya ki kamjooh kammon krehkaam ki chnat ka jylla wa yatoh wa ka chnat sorkar pyrdi.
Hawa yaklam wa kiwa mihkhmat ka State Legal Service Authority, u Montri da ong u wa da wan u yow tip yei rukom e chakri heiyatoh wa ka aiñ hapoh ka jylla Meghalaya wei kammon krehkaam i rukom bichaar hapoh ka jylla.
“Nga kmen O wa hawa nujor wa kiwi ki jylla ka ri, ki kaam pyrchah aiñ hapoh Meghalaya duna bha ki wei kmen O wow tip leh wa ym em ki kaam wa yatoh wa ka Dowry hapoh ka jylla”. Chooh chooh da ong u wa ka jylla waroh kawi man hi ko kawa suk heiwa ki bru paidbah ym em yatoh ki wa ki kaam pyrchah aiñ lane wa ki bru wa emkti ha ki kaam pyrchah aiñ.
Da khana u leh wa ka sorkar India da booh bhah ko ya ka poisa yow chna ya ki yung bichaar heiwa ya ka poisa da yabhah da 60-40 wa ki sorkar jylla.
Da pynsñiaw u leh yei sñiawkmen wym em i jia wa chah kyntait wow Register FIR yong ki bru wa ujor wei ym em pynemkaam ya ka kyndon 156 (3) ka Cr.P.C. Heiwa ha ki jylla kam ka Uttar Pradesh wa kiwi ki jylla cha khlieh ka ri da jia boonsien wa hap ki bru wow lai cha ka yung bichaar yow lai ujor yow bien ki pulit wow chimkhia ya ka FIR.
Da pynche u deiwa ong, “U pulit toh i kaam yong oo wow takit hawa yoh u yei ujor. Lada ki pulit kyntait ki wow takit, uwa chah ktah ye u wow lai cha ki Magistrate hapoh ka Section 156 (3) ka Cr.P.C. wei u Magistrate hapoh kani ka kyndon da em bor u wow pynmih hukum yow phah pynman ya ka takit”.
U Montri da ong u wa em boon ki kaam wa yatoh wa ki Drugs kamtæ iwa emkaam katni toh wow booh ya ki Forensic Science Labs kiwa biang tiar yow ye ki wow leh smat yeiwa emkaam. Ha ini i rukom daw smat wow ye u pynchitom ya kiwa emkti wei ya ki wym emkti leh yow lait u pynsepai yei por yong ki.
Da ong u leh wa ka sorkar hapoh i yahkhmat u Prime Minister Narendra Modi da pyrkhat bha ko ya ki kaam wa man pyrchah ya ki kynthai wa ki khynnah deiwa pynsmat yei bichaar yow lait nei chitom. Ka Protection of Children from Sexual Offences (POCSO) Act, 2012 toh kawa da yarap bha yow pait ya ki kaam pyrchah ya ki khynnah wei manda em ki sabut wa pynsakhiat da ka sayan, da em ki por wa da phah kset waroh chi rta du hadien 4 sngi.
Hawa kylli wa boon ki por wa slem wow yoh yei bichaar, u Montri da ong u wa emkaam i ya krehlang waroh yow pynduna yei chimpor wow e ya ka bichaar wa khaddooh da ki yung bichaar.
