Ka Dorbar Chnong Brichyrnot ha ka kyrwoh wa da phah lyngba u Waheh Chnong u Stanly Massar, da pynsñiaw u yei sñiawngooh hadooh kattæ kattæ yaka seiñ Jaintia Students’ Movement (JSM) wa kam ka seiñ da chim ko ya i rai wa chong yurim wa man ko ka seiñ wa sñiawthooh yei eh yong ki kam ka chnong wa dang sahdien dei wym kyrchaan næ pyrchah yaka Public Hearing ka wa daw man ha Khliehriat haka 21 tarik uni u bnai.
Chooh chooh ka Dorbar Chnong da e khublei ko yaka seiñ JSM kawa da wan yachem wa kiwa yahkhmat ka chnong heiwa da yoh wow phlai ha u President Rangbah yong ka u Leningstar Rymbai wa ha kiwi de kiwa yahkhmat ka seiñ haka 12 tarik uni u bnai hei wow ap yeiwa eh wa ki kam kiwa chong chnong hapoh ka thaaiñ palatsor.
Da ong leh wa kam ka chnong wa em cha nongkyndong, ym toh kawa em iyi iyi leh neiliang ki kaam pynroi pynpaar wa i yoh kaam yoh jaam ki khon khynroo khyllood.