Ki le ngut ki MDC ka BJP ha JHADC kitæ u Lakhon Biam, MDC 7- Nongbah Constituency, u Dawan Lyngdoh, MDC 10- Mynsngat-Khanduli Constituency wa u Krison Langstang, MDC 26- Sumer Constituency da thoh ki cha Secretary ka Executive Committee ka JHADC yow paan pynche heiyatoh wa i khut Tender wow chna yaka Additional Office Building ka JHADC.
Kani ka Tender toh kawa da pynmih haka 11 tarik uni u bnai toh kawa chongdor T.3,38,65,965 yow chna yaka Additional Office Building ka JHADC, Headquarter, Jowai wa kynthup leh yaka bai riñ bordiñ wow pyndait bordiñ, u booh yaki Septic tank, ki paikhana, wa i pynbiang um.
Kamtæ da ong wa da em chwa ki le tylli ki kaam kiwa da sdang chna kiwa dang sah kamjooh ka tulop ki wakreh ka ka JHADC. Kiwa dang sah toh wow chna ya ka Iawmusiang Market, i chna yaka District Council Court Building ha Riatsiatsim wa i chna yaka Dorbar Hall/Shopping Complex ha New Hill, Jowai, kiwa hadooh katni kiwa dang sah wa kynthup leh yaka poisa ki wakreh kawa da sah la 11 bnai kiwa toh u chimkhia bha heithaw wow chna ya kiwon kiwon kiwa thymme deiwa pyrkhat leh yeiwa man kattæ.
Da kdaw leh wa i chna yaka Iawmusiang Market ha Jowai toh kawa da sdang ha u snem 2008, iwa katni da sah la 12 snem khlem pyndep. Chooh chooh da ong wa ka Iawmusiang toh kawa heh dooh na ki yaw ha Ri-Loom Jaiñtia wei heijooh i por ka pliang-ja ki paidbah ka Ri-Loom Jaiñtia. Tangwa na ki daw wa tip du da ka Executive Committee, ym pu yoh u yoo yei pyndep ya kani ka yaw wei kamwa man i rukom pynlai kattæ daw chimpor da ki snem wow pyndep yaka. Kamjooh leh i chna yaka Dorbar Hall/Shopping Complex, New Hill, Jowai toh sa kawi kawa dang sah kawa ym pu dep u chna la 6 snem nadooh wa sdang u chna.
Heiyatoh won waka District Council Court Building kawa da jan toh wow pyndep, toh u pynlai yei bor yei por cha ka heiwa chisien wa da dep wow chna yaka, yaka Judicial Department daw kyrriah noh cha kani ka yung krehkaam wa thymme. Wei ini leh daw pynduna ko yei kynnai ka yung krehkaam ka Council wa katni wei ym emkaam de wow chna sa yaka Additional Office Building.
Kamtæ ki le MDC da kylli ki wa ya kani ka poisa wow chna yaka Additional Building toh kawa naka poisa ka Council hi namo ym toh wei lada toh da dawa wow pynsangeh noh chisyndon neidaw ka poisa toh kawa boon kamjooh wa ym emkaam wow chna ya kani ka yung krehkaam wa thymme wei wow su noh daka tulop ki wakreh kawa da sah la 11 bnai.