Shillong: Ka Hynñiewtrep Youth Council (HYC) ynnin ka sngi da e yaroh ko ya ka sorkar jylla wa da pynkrehkaam ko ya ka Inner Line Permit (ILP) hapoh ka Secretariat wei da kyntu wow leh kamjooh ha kylleiñ ka jylla wow yada yei wan psiah ki baar jylla.
“I e yaroh i ya ka sorkar wa ki bor pulit kiwa da pynkrehkaam ya ka ILP ha Secretariat,” da ong u President ka HYC u Robertjune Kharjarin ha kiwa pathai khubor hadien wa wan yachem ki ya u symbood montri rangbah ka jylla u Prestone Tynsong ynnin ka sngi.
Hawa kylli, u Kharjahrin, da kdaw yei rukom yang i kær kut ya ka Secretariat, deiwa ong, “I sñiaw kmen wa man ko kamwa pynkrehkaam ya ka ILP hadooh wa haap u e yei yuthoh wow pyntip ya kiwon kwah i wow yahcem wei na kawon ka seiñ wan i.”
Da ong u yeini neibhah ka HYC da yoo ko wa joor i sonteri ya ka Secretariat bar ya ki 40 lak ngut kiwa da chah kyntait ha ka NRC ka jylla Assam lada wan ki u psiah chapoh u pood u ang ka jylla Meghalaya.
Ha iwi tawon i liang, ka HYC da pynsñiaw ko yei sñiawngooh sñiaw chaniah ya ka sorkar jylla wa katni wow pynpsiah ya u dohnood ka Inner Line Permit ha ka Meghalaya Residents Safety and Security Act, 2016.
Da ong u wa u symbood montri rangbah da pyntikna u wa ka sorkar daw pait bniah biang ko ya kani ka aiñ wei daw pynpsiah ya ki kyndon ka ILP ha ka Meghalaya Residents Safety and Security Act, 2016.
Deiwa kdaw yei tkoh ka aiñ, u Robert da ong u wa ka Council da e yumut ko wow pait bniah ya ki kot ki sla ki bru wa wan na baar jylla wei toh u em pyrtuid ki hapoh ka NRC ha Assam.
Kam wow pynkynmo wa ha kini ki sngi wa da dep, ka HYC da dawa ko wow pynkrehkaam ya ka Inner Line Permit (ILP) wa ya ka National Register of Citizens (NRC) yow lait u yohlaad ki baar jylla wa kiwa na baar ri u psiah chapoh ka jylla khamtam na Assam hadien ka NRC.
Also Read: Syndet syndet psiah ki dkhot ka HYC ha pchem ka Secretariat wow dawa NRC wa ILP na ka sorkar
Discussion about this post