Ynnin ka sngi u Montri ka chnat Bhalang ka jylla uwa man leh u MLA ka Khliehriat, u Kyrmen Shylla da booh mooyurim u wow chna thymme noh ya u sarok Rymbai-Borghat-Jalalpur Road (RBBJ) wow myntoi ki 9 chnong ha i lut wa T. 23.94 klur.
Hajrong ini hawa yaklam wa u Chemi Rupsi u waheh chnong ka Bataw da ong u wa kam ka thaaiñ dap ko dei sñiawkmen neibhah ha ki 10 tylli ki snem da chem chitom bha ki paidbah khamtam hei wow lai yaaw lai haat, ha i kjut i chitom wow lai cha ki thaw sumaar neibhah wa da sih ware u sarok.
Chooh chooh da e khublei u ya u Kyrmen Shylla wa da wanrah u ya kani ka kreh wow chna noh ya uni u sarok deiwa ngait skem leh wa i kreh u man iwa lai bait khnang wow myntoi biang ki paidbah ka thaaiñ.
U Firmly Rymbai, Waheh Chnong ka Lakadong Umlatdoh da ong u wa kam ki paidbah dap ki dei sñiawkmen neibhah uni u sarok man u u yong ki wei kyrmen skem u wa u chna hok wei wow pyndep hok ki yei kreh ya u sarok khnang wow myntoi kiwa lai wa wan na oo.
Ngait skem u leh wa ka PWD u kreh hok ko katkam wa da man ya uni u sarok wei ymtoh u kreh khalær ki wei kam ki waheh chnong daw booddien ki yei kreh neipor cheipor.
Neiliang u Namphrangmi L Talang uwa man u waheh chnong ka Umlyngsha da sñiawkmen u wa u Kyrmen Shylla uwa man leh u MLA ka thaaiñ da booh u ya u mooyurim wow chna ya uni u sarok.
Da khana u wa u sarok RBBJ pynyabi u ya ki 16 tylli ki chnong heiwa ki 9 chnong haap ki hapoh ka Khliehriat Constituency katwa ki 7 tylli won haap ki hapoh ka Sutnga Saipung Constituency heiwa u MLA yong ka toh u Shitlang Pale, wei ha ki snem wa dadep da kyrmen wow kreh ya oo waroh tangwa neiliang u Kyrmen Shylla da pynsñiaw u yei eh i khor wow yoh poisa u chna waroh.
Chooh chooh da yooluti leh neini chaphrang ka sorkar wa ka PWD daw ye ko wow mang poisa wow chna noh ya oo waroh.
