U Prime Minister ka ri, u Narendra Modi da pynsñiaw u yei sñiawngooh ya kiwa chong chnong ka Kongthong wa da chna ki yei sur wa kyrpang neibynta yong oo kam chibynta i yaleh ka sorkar India wow tipmit ya kani ka chnong kam kawi na ki thaw uiñke suwari wa enkaam.
Hawa jubab ha Twitter ya u Montri Rangbah ka Meghalaya, u Conrad Sangma uwa da pynsñiaw cha u Modi ya ini i sur wa da chna kyrpang ya oo, u Modi da ong u;
“Sñiawngooh ya kiwa chong chnong ka Kongthong ya ini iwa da leh ki. Ka sorkar India toh kawa kreh chitom wow pynku ya ki kaam uiñke suwari hapoh Meghalaya. Wei da yoo leh ya ki dur ka Cherry Blossom Festival hapoh ka jylla. Kiwa miat bha.”
Kam wow pynkynmoo wa ka chnong Kongthong wa em ha East Khasi Hills da tip ya ka kam ka Whistling Village, da jied ya ka wow yakhun ki yei naam “Best Tourism Village” wa khut pynman da ka United Nations World Tourism Organisation (UNWTO).
Ka chnong Kongthong man kyrpang ko heiyatoh wa i rukom khut siñ pyrtuid ya ki bru deiwa riñsur ya i pyrtuid yong ki iwa ye u man hei rukom siaw wow kieh ya i pyrtuid yong ki ya iwa da yah nadooh ki por wa nachwa.
Chooh chooh ya kani ka chnong Kongthong neiliang u MP ka Rajya Sabha, u Rakesh Sinha da tyrwa u leh ya ka UNESCO wow kynthup ya ka ha ka Cultural Heritage yong ka UNESCO.
