Jowai: U kyrtong samen u Lakhon Dkhar naka chnong Khliehtyrshi uwa da jooh yakhun Election MDC ha u snem 2014, ynne ka sngi da pynbna paidbah u wow yakhun biang u ya ka Election kam u kyrtong samen naka 4-Sohmynting Khliehtyrshi Constituency pyrchah ya u Madonbai Rymbai uwa man kam u CEM ka JHADC haka yalang wa khut lang ya kiwa kyrchaan yong oo ha Khliehtyrshi.
“I daw wa pynman ya nga wow yakhun Election nadooh u snem 2014 toh wa nga da yoo oo yei rukom pynkrehkaam yahkhmat paidbah da u MDC wa katni kawa ym em man ko kawa biang namo kawa che bha, kamtæ da i yah wa i kyrchaan ki paidbah, nga da rai O wow yakhun biang ya ka Election ha kani ka kynti khnang wow yoh u pynkrehkaam ya i hok u paidbah haka luti wa toh,” da ong u Lakhon Dkhar.
Da pynrap u leh da iwa ong wa sñiawskem u wow ong wa du hadien wa mih ka sur wow yakhun biang, ki paidbah du ha ki por wa tbian da poi ki wut wut wei ini man i chibynta i dak yong ka thong jop neibhah haki san snem ki paidbah ym yoh ki iyi iyi leh.
Hawa kylli wa hadooh katwon wa sñiaw tikna u wow pynrem ya u CEM, da jubab u deiwa ong wa ka rai chong ko ha ki paidbah neibhah haki 15 tylli ki snem wa da lai da puræ wei da yoo hi ki dei khmat yong ki hi.
“Nga kyrmen O wow jop ha kani ka kynti neibhah i lai luti em boon ki durkhmat wa thymme wym jooh kyrchaan ya nga haka Election wa dadep tangwa katni da emlang ki wa nga nalor wa nga yoh O leh ki kyrchaan wa rap boon bar iwa yoh O ha u snem 2014”.
Da pynkut u deiwa ong wa waroh kiwa dadep jia ha kini ki 15 snem wa da lai ki paidbah da bichaar ki, kamtæ da i bor ngait wa skem ha ki paidbah kiwa da pyntikna ya nga wow e ya i kyrchaan wa pura wow poi haka thong.
Ha kani ka jooh ka sngi da thung leh ya kiwa kitkaam yong ka Election Committee ka 4-Sohmynting Khliehtyrshi Constituency kamjooh leh ki Convener ha ki chnong waphær waphær.
Discussion about this post