Ka NPP kam chibynta wow pynkhreh ya ka Election MLA ha Sohiong Constituency kawa daw pynman noh ha uni u bnai wow wan, neiliang ka Party da pynman ko ya ka yalang ha yung u kyrtong yong ka u Samlin Malniang ha Sohiong deiwa wan sakhi kiwa boon kiwa yahkhmat ka Party kiwa kynthup ya ki Symbood Montri Rangbah kitæ u Sniawbhalang Dhar wa u Prestone Tynsong deilang wa ki hajar ngut kiwa yahkhmat na ki chnat waphær waphær ka Party wa em hapoh ka Sohiong.
Neiliang u Prestone da ong u wa ha ka 13 tarik ha ka sngi niaw Vote, ka NPP daw yoh noh ko sa uwi u MLA yow pynman ya ka wow em noh ko 27 ngut ki MLA deiwa e nongmuna wa katni da boon kiwa sihlet nei bakla jied ya kiwa mihkhmat du hadien ar bnai wa da dep Election, kamtæ da kyntu u ya ki nong Sohiong wow chim kabu ya kani ka kabu ksiar yow lait ki wow sihlet deiwa jied da u kyrtong ka NPP, u Samlin Malniang uwa nadooh 2018 hadooh 2023 ym duna ya T. 400 klur tam ki kreh hapoh ka Constituency da wanrah u wei kitæ kiwi won ki kyrtong toh ki wym pu em wanrah chi suka leh.
Kamtæ da ong u wa ini mut wa u Samlin toh uwa da tip yei kaam wei lada jied da kiwa dang thymme daw lut por du wow wiar luti hapoh ka Secretariat manda wai kawi ka dwar poi cha paikhana manda wai da kawi won poi cha lait wei kat u chem luti ki da kut wei por ki.
Neiliang won u Samlin da ong u wa oo kam uwa mihkhmat iwa hakhmat dooh toh wow wanrah yei yatylli hapoh ka Constituency wei ki paidbah ymtoh u ap ki ya kitu kiwa pynbaad kiwa kwah wow pynkulmar deiwa chna boon ki khubor ha YouTube neibhah kitu toh kiwa kwah wow yoh Subscriber wei wow boon kiwa pait ya ki Video yow boon i yoh poisa ki.
Chooh chooh da ong u kiwa ya batai kiwa Comment man ki leh ki wym toh napoh ka Constituency.
Kamtæ da ong u wa ha kani ka Election u lai chakhmat deiwa ya sñiawthoohlang nadoooh ki MDC, ki Unit wa ki Circle waphær waphær ka Party yow ya psiah cha ki yung ki sem ki bru yow pynche wei wow pynsñiawthooh.
Da pdiang sñiawbha u leh ya ki manbei manpa kiwa dang psiah cha ka Party hapoh ka NPP yow ya yoh wow chaad kmen ha ka 13 tarik.
Neiliang u Sniawbhalang da ong u wa katkam i chem dei yong oo hi hawa yaklam wa ki bru hapoh Sohiong, ka lær wei iwa khana ki paidbah toh ym ye wow yaleh wa u Samlin, kamtæ da ong u wa ki paidbah ka Sohiong daw yoh myntoi chooh chooh ko.
