Ka soskular Memorandum of Agreement (MOA) yow pynchna ya ka Wah Umiam Hydro Electric Project (50 MW) Stage-I waka Wah Umiam Hydro Electric Project (100 MW) Stage-II da ya soi ynne ka sngi hapyrdi ka sorkar Meghalaya, ka chnat Bordiñ waka North Eastern Electric Power Corporation Limited (NEEPCO) ha ka yalang wa da pynman ha Pinewood Hotel, Shillong deiwa emlang u Prestone Tynsong, Deputy Chief Minister kam u kongsan.
Hawa e yei klam, u Prestone Tynsong da pynsñiaw u yei sñiawngooh ya ka NEEPCO deiwa ong leh wa ini i soi ya kani ka soskular toh kawa daw pynyoh myntoi bha hadien.
U Prestone da ong u wa ka sorkar u krehlang ko deiwa pynbiang yeiwa emkaam yow pyntikna wa da pyndep yei kreh hei por. Da ong u leh wa i pynmih bordiñ toh iwa da chem chitom bha hapoh ka jylla na ki por cha ki por, wei katni ka sorkar ye ko wow pynmih du 350 MW tangwa iwa emkaam won toh 650 MW iwa pynyoo katwon duna i ye wow pymih bordiñ. Da pyntip u wa ka sorkar da leh ko ya iwa boon yow thooh laad kammon wow pynkylla noh ya ka chnat Bordiñ, kamtæ ini i soi soskular wa ka Company ka sorkar pyrdi CPSU (Central Public Sector Undertaking), ka NEEPCO toh iwa emkaam bha.
Chooh chooh da ong u wa ha ki snem wa nachwa da soi ya ki soskular wa ki Company ki bru samen tangwa na ki daw wa boon da hap wow pyndam ki, wei da kyrmen u wa ka NEEPCO kawa man kam ka yong sorkar ini i soi soskular ym kut ko du ha ka kot wei daw mankaam ko.
U Prestone da kdaw u wa ka Meghalaya em ko yei bor wow pynmih hadooh 3000 MW wei yooluti u wa hadien ini daw ye u soi chooh chooh kiwi ki soskular, wei i artatien ki paidbah leh daw wiar i deiwa soi ya kani ka soskular wa ka CPSU. Kamtæ da kyntu u ya ka NEEPCO wow krehlang waka Meghalaya yow ye u pynmih Bordiñ hadooh wow dai leh cha kiwi ha ki por wow wan.
Ya kani ka soskular da soi da u D D Shira, Joint Secretary ka sorkar Meghalaya, neibynta ka Power Department wa u Anil Kumar, Director Personnel neibynta ka NEEPCO.
Kiwi de kiwa da emlang leh toh u Abdus Saleh, Chairman, Meghalaya State Planning Board, u Pravin Bakshi, Commissioner and Secretary, Power Department, ki sahep ka sorkar deiliang ki yong ka NEEPCO.
